Senior Women’s T20 Trophy Plate group match-ah Mizo nulaten a zawna hnehna changin group hmahruaitu an ni mek.
Mizoram hmeichhe team hian Thawhtannia wicket kuaa inelna thlengtu, Nagaland an hneh hnuah Thawhlehni khan Arunachal Pradesh lakah wicket sarihin an chak leh..
Nagaland Cricket Stadium, Sovima, Nagaland-a inkhelah hian thum vawrah chak, Arunachal nulaten vuak hmasak an thlang a, over 20 chhungin run 89 thawk chhuakin mi pasarih an thi.
Mizoram tan Venghnuai nula, ZD Lalnunhrili chuan over li a vawmah run 12 pein mi pahnih a vawm thi a, player of the match-a thlan a ni.
Chak tura an run mamawh an umnaah pawn lam atanga lak (guest player) pahnih, Ankita Bhingade leh Indrani Roy te chuan run 39 ve ve siamin wicketkeeper/batter Roy-i hi a tawp thlengin a dam a. Mi pathum thiin over 16.2-ah an mamawh run an thawk chhuak a ni.
Plate Group-ah Mizo nulate hi Bihar nen khelh hnihah an chak ve ve a, point riat ve ve an hmu tawh a. Net run rate-ah Mizoram hi an that zawk avangin hmahruaitu an ni mek.
Ningani hian Bihari nulate nen hian an inhmachhawn dawn a, an chak leh a nih chuan a sang pahniha tel a beiseiawm sauh dawn a, a pawimawh dawn hle a. An chak palh a nih pawhin beiseina erawh a la bo dawn chuang lo a ni.
INKHEL KHAIKHAWMNA:
MIZORAM – 94/3 (Over 16.2)
Ankita Bhongade – 39 (39)
Indrani Roy – 39* (40)
ARUNACHAL PRADESH – 89/7 (Over 20)
Sardum Ligu – 20 (36)
ZD Lalnunhrili – 2/12 (Over 4)
Wicket sarihin Mizoram an chak.