Aizawl: Land Revenue & Settlement Minister B. Lalchhanzova hovin Thawhlehni khan Mamit DC Conference Hall-ah Bairabi atanga Mamit (NH 06) kawngpui laih tura Damdiai khaw chhunga ram neih chungchanga harsatna awm mek siam that dan tur an sawiho.
Mamit Bawrhsap Suvigya S. Chandra, IAS kaihhruai thutkhawmah hian Damdiai chhung kawngpui thar paltlangna tura Tripura atanga Bru repatriation kaltlanga lo kirte awmna tura ruat bik ni lo, mi dang hminga periodic patta (P-Patta) chhunga kawngpui hnaiha an awm avanga hmalakna khaihlak mek chu a chin fel dan tur an sawi ho va, harsatna hi chin fel a nih vat theih nan VC leh revenue department chu a rang lama hma la tura tih an ni.
He hunah hian LR&S Secretary Vanlalmawia, IAS leh Under Secretary Lalhruaitluanga te bakah Mamit District Revenue official-te an tel a; meeting zawh hian Minister B. Lalchhanzova hian Mamit DC Office tualchhunga Revenue Branch Office Building sak mek hmalakna thlen chin te a hmunah a tlawh nghal bawk.