Aizawl: Mizoram Police-te chuan tun hnaia ruihhlo leh dan phal loh (contraband) do beihpui an thlak zelah ruihhlo, foreign cigarette, zu thahnem tak an mai.
Aizawl District Executive Force (DEF) hnuaia Bawngkawn Police Station team-te chuan October 26, 2026 khan Zemabawk Forest Check Gate-ah Eco Van (MZ01AE8001) endikna atangin Methamphetamine kg 1 an man a, a khalhtu Lalhmangaiha (28), Champhai Kahrawt Veng nia inchhal chu an man nghal a ni.
Hemi ni vek hian Seling Outpost team-te pawhin Zero Point, Seling-a an endiknaah Tata Sumo (MZ-03-7043) atangin Champhai Zote mi Lalruatliana (33) kut atangin Foreign cigarette Patron Nano White bawm 13, Rs nuai 8 vel hu an man a, he thil man hi Legal Metrology Department kutah an hlan chhawng a ni.
Seling Outpost team-te bawkin October 23, 2026 khan Maruti van (MZ-01-AB-1877), Chawnghmingliana (30), Bualpui H mi khalh atangin Royal Stag Whisky case 30 (bottle 360), Rs 3,60,000 hu an man bawk.
Siaha Police-te pawhin October 21, 2026 khan Siaha khaw daifem ramhnuaiah a neitu hriat loh rakzu siamna factory hmun thum ngawt an hmuchhuak a, Rs 4,50,000 hu vel nia chhut rakzu leh a siamna hmanruate chu a hmunah an tichhia a ni.