Aizawl: Animal Husbandry & Veterinary Department, Mizoram chuan Livestock Health & Disease Control Programme (LHDCP) – National Animal Disease Control Programme (NADCP) hnuaiah Classical Swine Fever (CSF) vaccine pek runpui (4th Round) chu Thawhlehni khan biakhmuhtheih kaltlanga hawn a ni.
He hun Joint Director (LH) Dr K. Lalhlimpuii’n a hawnnaah hian CSF hi vawk hri hlauhawm tak, a vei tawhte zaa 80 atanga zaa za thleng thihpui theih a nih avangin leh Mizorama eizawnna bulpui pakhat a nih avangin vaccine pek chu a pawimawh takzet tih a sawi a, vaccine pekte hi Bharat Pashudhan Portal-ah upload zel a nih bakah, vaccine pek hma leh a hnuah ran thisen endik zui a nih tur thu a sawi bawk.
He scheme zaa za sorkar laipui tumsak hi kum khatah tum hnih kalpui thin niin, ICAR-IVRI siam vaccine thla 24 chhung veng thei chu vawk thla thum chunglam hnena pek a ni dawn a, department chuan vawk vulhtute leh khawtlang hruaitute chu he beihpui tha taka tawiawm a, vawk natna danglam a awma report rang turin a ngen bawk a ni.