Pulitzer Prize hial pawh lo dawng tawh, Indian photojournalist Danish Siddiqui-a nu leh pate chuan an fapa thihna chungchangah dan anga Taliban-te laka rorel an phut.
Kum 38 mi, Reuters journalist hi nikum khan Afghanistan-a hna a thawh laiin Taliban-ten lambunin an that.
A nu leh pa hian International Criminal Court (ICC)-ah Taliban hruaitu mi parukte hrem turin an thlen.
An fapa hi Taliban hian hun eng emaw chen an kawl a, an sawisa a, an that a, a ruang pawh an chan darh niin an sawi.
“Kan fapa duh tak, Danish-a hi chanchinbu hna a thawh laiin Taliban-in an that a ni,” tiin a nu, Shahida Akhtar chuan thuchhuah a siamah a tar lang.
Taliban chuan Siddiqui-a thata an puhna hi phain a ruang an hmuh chuan chan darh vek a lo ni tawh zawk niin an sawi a. A nu leh pa hian an pawmpui lo.
“Taliban-te hian chanchinbumi a nih avang leh Indian a nih avangin Danish-a hi tumin an that a, hei hi international crime a ni,” tiin an dan hre mi, Avi Singh chuan a sawi.
“An thah hnuah a ruang hi chan darh niin lirtheia chil a ni a. A taksa hmun hrang hrangah sawisakna hnuhma leh silaimu luhna leh chhuahna hmun 12-ah a awm,” tiin a nu leh pa thuchhuahah tar lan a ni.
Mumbai-a cheng, Siddiqui-a hi Reuters-ah hian kum 10 chuang thawk tawhin a thlalakte chuan khawvel fak hlawhin tun hnai maiah pawh India-in Covid hripui thawh hnihna a tawh laia a ruala mi vui lai a lakte pawhin fak a hlawh hle.
Kum 2018 khan feature photography bikah Pulitzer Prize a dawng a. Adnan Abidi leh an thawhpui dang pangate nen Myanmar-a hnam tlem zawk, Rohingya-ten harsatna an tawh dan tar lanna thla a lak avangin a dawng a ni.
July, 2021 khan Afghanistan-a Kandahar velah, United States leh an thawhpui ramten President Joe Biden-a hun tiam, September 11-a inthiar chhuah vek an tum buaipui turin a kal a ni.
“Kan fapa hi a lo kir leh tawh dawn lo va, kan dilna hi min tihhlawhtlinsakin a tan rorelna dik hlenchhuah a nih ngei kan beisei,” tiin a pa, Prof. Akhtar Siddiqui chuan a sawi.