Aizawl: Mizoram University (MZU) a Department of Zoology Head, Prof. H.T. Lalremsanga leh Asst. Professor Dr. Mathipi Vabeiryureilai te chuan an research scholar Krijobati Thaosen leh Duasa Mara Hlychho te nen Assam-a Dima Hasao district huam chhung, Umrangso khaw bul ramhnuaiah Ramdaidep (Bent-toed Gecko) species thar an hmuchhuak a, a hmingah Cyrtodactylus dumaensis tiin an phuah.
He hmuhchhuah thar chungchang hi Indian Scientific Journal, Journal of Threatened Taxa volume 18 (issue no. 10)-ah tlangzarh a ni.
He species thar hming atan hian Dimasa ho chenna hmun hming chawiin phuah a ni a, a pianhmang leh DNA zirchianna atang chuan Halflong-a hmuhchhuah tawh Cyrtodactylus vanarakshaka nen inhnaih berin, a DNA inan lohna hi zaa 5 atanga zaa 6 vel a ni.
Ramdaidep te hi khawvel pumah species 406 chhinchhiah tawh niin India hmarchhakah hian species 32 hmuhchhuah an ni tawh a, dai leh ramhnuaia hmun biru, lei kua leh thingkawrawng leh hnim zingah khawsa thin te, zan thimhnuai chauha chaw zawnga vakchhuak an nih avangin hmuh zen zen an harsa hle a ni.
Dr. M. Vabeiryureilai chuan he hmuhchhuah hian India hmarchhak chu nungchaah a hausak a ni tih a tilang chiang hle a, heng nungcha tenau zawkte felfai taka zirchian leh humhalh hi a pawimawh takzet tih a sawi.