Israel inthlanpuiah mipuiten Thawhlehni khan vote an thlak a, vote tlate chhiar tawh chinah party mala sorkarna siam zo an awm hmel loh hle a, exit poll-ah pawh hetiang tho hian tar lan a ni.
An ram rorelna in, Knesset-a thutna 120 awmah sorkar siam turin member 61 tal thlawpna a ngai a, chu chu prime minister thar an neih theihna bul a ni.
Central Elections Committee chuan he chanchin ziah lai, India-a Nilaini tlai thlenga vote tla zahve aia tam chhiar tawh chinah Likud chu party mala bial la hnem ber an nih thu leh 27 an lak tawh thu an sawi.
Prime Minister Benjamin Netanyahu-a kaihhruai tangrual chuan bial 54 an lak theih rin a ni a, a khingtu, Gadi Eisenkot-a kaihhruaiten 50 an lak theih rin a ni.
Vote thlak theih hun a tawp hnu, Thawhlehni zan tlai tawh taka exit poll paliah pawh inthlanah hian sorkar siam tuma inbei pahnihte hi an inkhing tawk hle dawn tih tar lan a lo ni tawh.
Kan 11 leh Channel 13-in poll an buatsaihah Netanyahu-a kaihhruai sang hretin Eisenkot-a lam hian bial 51 la turin an chhut lawk ve ve a. Channel 12-in Netanyahu-a lamah bial 52 a dah laiin Eisenkot-a lamah 49 an dah a. Channel 15-in prime minister dinhmun titha berin bial 55 la tur leh eptu lamin 49 la turin a tar lang.