India khawchhak lam vaukam hrul chu Bay of Bengal atanga insiam cyclone na takin a nuai ta a, hriat theih chinah mi pathum vel an thi a, in tam tak chhiain thlai chinte pawh a chhe nasa hle a, ruah leh thli na tak a keng tel tih thuneituten an sawi.
Cyclone Arnab hi India Meteorological Department (IMD)-in ‘very severe cyclonic storm’ an tih, an tehnaa chak pathumna huanga an dah niin Nilaini zing khaw var hma khan Andhra Pradesh-ah khawmual a lut tih an sawi.
“Andhra Pradesh hi a tuar na ber an ni a, mi pathum an thi a ni,” tiin National Disaster Response Force (NDRF) hotu lian, Narendra Singh Bundela chuan thuthar lakhawmtute a hrilh.
Ruah tam tak sur leh thli na tak tlehin in 180 vel leh thingkung 220 a len tlu a, hmun tam takah power supply a khaihlak phah niin Andhra Pradesh Chief Minister N. Chandrababu Naidu-a chuan a hnua Union Home Minister Amit Shah-a hnena lehkha a thawnah a ziak.
Thi zinga pahnih hi thing tluin a delh niin pakhat hi electric-in a man a ni tih Naidu-a pisaa hotuten Reuters an hrilh.
An thenawm, Odisha erawhin an tuar na vak lo tih Bundela chuan a sawi a, thli na tak a ken chu khawmual a kai chiah hian a chakna a hloh nasa tih a sawi.
Andhra Pradesh leh Odisha-ah hian cyclone thawk tur inbuatsaih nan mi 1,80,000 chuang hmun himah an lo suan chhuak hman a ni.
Khawchhak vaukam hrulah hian zirna in khar a ni a. Rel leh thlawhna service eng emaw zat tihtawp lailawk a ni bawk.
Bundela chuan NDRF leh state team eng emaw zat cyclone thawhnaah hian an thawk a, a hnaih deuh state thenkhatah ruah tam tak a sur bawk tih a sawi.
Television-a video leh thlalak tihchhuahah chuan thingte chu kawngpuiah a tlu a, thawktuten ruah sur hnuaiah an thian lai a lang.
Arnab thawk tur avang hian sangha mantute chu tuipuia chhuak lo turin an ti lawk a. Weather department chuan thlai chinte a chhe thei a, in derthawng deuh leh inbiakpawhna hrui zam a chhe thei bawk tih an sawi lawk.
Thlipui thawk tur hi darkar khata km 150 thlenga chak a ni thei tih sawi lawk a ni a. Tuipui fawn pawh hmun hniam deuh lai, a bikin Andhra Pradesh-ah chuan a nih dan thin pangngai aia metre 1-1.5 thlengin a sang thei tih sawi lawk a ni bawk.
Indian civil aviation ministry chuan Andhra Pradesh-ah hian thlawhna tumhmun pathum chu khar lailawk a ni tih a sawi.
Hetih lai hian Arnab avang hian India thenawm, Nepal-ah pawh mite chu ni thum chhung tlang sanga kea kal an khap a, ruah leh vur thli a thawh palh an hlauh vang niin Immigration Department information officer Gita Ghimire-i chuan Reuters a hrilh.
Tun lai hi Nepal-a kea tlang sang fanga chhuah hun lai niin ni tin kal phalna hi mi 750 vel hnena an pek ziah hun lai a ni.
Thawhlehni khan Nepal-ah hian Ningani zan atanga Pathianni thlengin Himalaya tlang dungah khualzinte chu Arnab thawk avang hian tlang sang laiah ruah a sur thut thei a, vur a tla thei a, vur a tawlh thut thei tih hrilh lawkin hmun sanga chet an khap rih a ni.
Arnab hi Bay of Bengal-a insiam niin heng lai hmun hi kum tin tropical cyclone na tak tak insiamna thin hmun a ni a, India-a khawchhak vaukam a nuai fo tawh thin.
October, 1999 khan super cyclone thawkin Odisha a nuai a, mi 10,000 dawn thi awmin an rama khuarel chhiatna thlenga thi an tam ber zinga mi a ni.
Tun dinhmunah erawh India hian khawchin thlir lawkna hmanrua a nei tha tawh a, chhiatna lian thleng thei laka inven leh inralrinna hun tha siamin hei hian nunna leh thil dang chân theih tam tak a hum phah a ni.