MBOCWWB Rahbi Chhertu Mizo Inchai Title Fight chu Nilaini zan atang khan tan a ni ta a, zan thum chhungin freestyle wrestling nen inchai vawi ruk zel a awm dawn bawk.
LPS Arena, Falkland-ah Ningani zan nen bik a hmuna en duh tan ticket Rs 50-in lei a ngai a, a tawp zan, Zirtawpniah Rs 100-in lei a ngai dawn a, LPS 1 leh LPS Youtube Channel-ah member tan live-in pek chhuah a ni dawn a, YouTube atanga en tur tan member ni sa lo tan Rs 179-in nih a ngai.
Zan hmasa berah hian nulaihawl champion, Melriat nula, Bawngkawn West-a cheng, Elizabeth Rohlupuii’n amah chotu, Ruthi Lalhruaitluangi, Kolasib Saidan lakah title humim tumin thawh nga an inchai a. Lalchhanhima kalsan, Pate champion kawnghren inchuhin Saitual inchai chak ve ve, B Lalawmpuia leh Johny Lallawmkima an innuai bawk.
Freestyle wrestling-ah thlan chhuah bikte an inlanin Johny Lalruatsanga, Mamit leh Lalduhawma, Kolasib); Lalmuansanga, Kawnpui leh Rohit Halder, Aizawl; Nancy Lalremruati, Mamit leh Emily Lalliansangi, East Lungdar; Franky Ramthanpuia, Mamit leh Samuel VL Hmangaihzuala, Thenzawl an inchai ang.
Ningani zanah kum 2014 atanga champion chho char char, Lalvenhimi, Bethlehem Veng chuan amah chotu, Electric Veng, Lunglei tleirawl, C Lalrinfeli lakah title humim a tum dawn a. Palaihawl champion Remruatpuia, Bethlehem Vengthlang chuan thawh sawm chhungin amah chotu, Ramropuia, Mamit hneh ngei a inring bawk.
Freestyle wrestling vawi li bawk awm lehin Lalduhsaka, Kolasib leh Vanlalchhuanga, Aizawl; Mary Lalduhawmi, Mamit) leh Vanlalhriatpuii, Maite; R Vanlalmuana, Aizawl leh Zorammawia, Kolasib; Lalbiakkima, East Lungdar leh Lalhruaitluanga, Kolasib an inchai ang.
Zan hnuhnung ber, Zirtawpniah Palian champion lai, Lalsangliana, Upper Republic leh Lalremtluanga Chhangte, Zobawk Lunglei an inlan dawn a, a hnuhnung berah an inchai ang.
Thawh sawm zel mipa an inchai dawn a, thawh nga chhung hmeichhia inchai ve thungin Nulian champion Saichal nula, Lalhmangaihsangi’n a hneh tawh, Zodinpuii, Ramthar, Lunglei a hmachhawn nawn leh dawn a, kum hnih kal ta khan point 11 ve ve an hmu a, inbanphawi hmanga a chak zawn hmangin Sangi’n title a humhim hram a ni.
Freestyle wrestling-ah Lalngaihsangi, Kolasib leh Maria VL Malsawmtluangi, Mamit; Zothankima, Serchhip leh J Lalrinkima, Aizawl; Lalthlengliana, Aizawl leh R Lalrinchhana Serchhip; Zothansanga, Serchhip leh C Lalawmpuia, Aizawl an inchai dawn bawk a, anni hi Mizorama wrestler tha leh beiseiawm tak takte an ni.