Aizawl: Higher & Technical Education Minister Dr Vanlalthlana chuan Nilaini khan a pisa-ah thu thar thehdarhtute kawmin, sorkar kum hnih leh a chanve chhunga a department Higher & Technical Education chungchang bika hmalakna hrang hrang leh hmasawnna a sawi a. Technical education, college zirtirtute dinhmun siam that, zirna in hmasawnna leh scholarship sem chungchangah hmasawnna tluantling a awm chho mek tih a sawi.
Dr Vanlalthlana chuan Technical education lamah NIT Lengpui forest clearance buai thin chu sorkarin Rs vbc 10.39 pein hna chhunzawm theih anih tak thu leh Mizoram Engineering College (MEC), Pukpui-a degree course pahnih – Civil Engineering (30 intake per year) leh Computer Science Engineering (30 intake per year) te class tan phalna chu All India Council for Technical Education (AICTE) atanga hmuh a nih tawh thu a sawi.
H&T Education Minister chuan, “MEC atan hian post 80 create tawh niin post 32 hnawh khah phalna kan nei tawh a. Principal leh zirtirtu lakna tur hi MPSC-ah a awm mek. Building-te pawh chei that mek niin a kal kawng te, tui supply-na tur te, electric supply-na tur te leh a tul dangte buaipui chhoh mek a ni,” tiin, kum 2027-2028 academic session atanga tan tum a nih thu a sawi.
MERITE project hnuaiah Women’s Polytechnic Aizawl leh NIT te tan sum hmuh a nih bakah, Mizoram Polytechnic Lunglei ram buai pawh Supreme Court leh High Court thlenga khin zui a ni a, zirlaite industry mamawh thiamna hlan a nih theih nan IBM SkillsBuild nen kum thum chhung atan MoU ziah a ni bawk.
General Education leh zirtirtute siam thatna hmalakna tar langin, Minister chuan college zirtirtu 136 hnenah promotion pek a nih tawh thu leh casual assistant professor-te hlawh tipungin contract zirtirtu 22 dah ngheh nan MPSC-ah DPC neih fel a nih thu a sawi. Department hnuaiah post thar 217 siam a ni tawh a, hna lak pawh 95 regularise-in post 54 direct recruitment a lak tawh a ni a, zirlaite zirtirtu assess tirna hma lak a nih bakah Mizo zirlai 15 ten a thlawna IAS coaching an zir mek thu leh Mizoram State University pawh Lungleia sawn niin, VC leh Registrar lak nan hma lak chhunzawm mek thu a sawi.
Scholarship Board hmalakna hrang hrang chungchangah, state budget-ah matching share dah a nih tak avangin scholarship pek a awlsam phah hle tih sawiin, Post Matric ST Scholarship-ah diltu percent 98.32 leh Pre-Matric-ah percent 90.64 te hnenah scholarship sem a nih thu a sawi a. Bank account leh document dang fel loh avanga dawng rih lo mi tlem te an awm tih sawiin, Merit Scholarship leh National Means Cum Merit Scholarship-te pawh tluang taka sem a nih thu leh central scheme hrang hrang hmangin zirlai thahnem tak tanpuina pek zel an nih thu a sawi.