Aizawl: Mizorama sorkar tawhten NEDP, NLUP, SEDP leh hand holding Policy-te hmanga ei leh bara intodelhna pakhat mah an la thlensak loh avangin a taka thutiam tihlawhtling thei sorkar Mizoram mipuiten an mamawh tih BJP Mizoram State President Dr. K. Beichhua, MLA chuan a sawi.
Thawhtannia an party pisa-ah Karthar Inhlanna leh Political Session-ah thu sawiin Dr. K. Beichhua chuan tun thlenga inbumna auhla la awm fo avangin mipuin BJP sorkar an nghakhlel tawh hle a ni, a ti.
Ei leh bara intodelh, power leh tui hnianghnar, health infrastructure leh kawngpui tha neih hi sorkar din chhan tur a nih thu sawiin Siaha bialtu MLA chuan, a tihlawhtling thei chu BJP a nih thu a sawi.
Congress Party-in BJP hi Kristiante tana hlauhawm anga an beih thin thu sawiin BJP-ah Kristiante tan harsatna a awm loh thu leh Congress hruaitute anga Hindu serh leh sang khawih ve ngai lo an nih thu a sawi bawk.