Aizawl: ZPM sorkar chuan hna lak dawnah advertisement leh written test hmanga dik tak leh mumal taka hma lain, pension dik lova la surrender-te avangin kum tin Rs vbc 15 bawr vel sorkarin a hum thei dawn tih CM Advisor & ZPM Vice President Lalmuanpuia Punte, MLA chuan ZPM General Headquarters chhung inkhawmah a sawi.
Thawhtannia ZPM party pisa-a inkhawm Lalmuanpuia Punte chuan thu sawiin, tun hnaia Home Guard lak tur pawh Home Minister-in dik tak leh fair takin a kalpui leh dawn thu a sawi a, duhsak bik neih a nih loh avangin party mite pawh an vui hial thin thu a sawi.
Ruihhlo do chungchangah Operation Jericho hmanga police awm lohna khaw 13-ah police dah an nih thu leh he hmalaknaa Central YMA thawhpuina avangin sorkar a lawm hle a ni, a ti bawk.
Minister-te tih tak takna avangin LESDE-ah Rs vbc 25 hmanga ITI sak that a nih thu leh Revenue department-ah pawh Maumual, Ramhlun, Zemabawk leh Chekbawk-ah te land pass tam tak tihfel a nih thu a sawi a. ZPM party manifesto puitlin nan budget session hmasa berah ruang phurhna tur senso khung nghal a nih avangin eptu MLA-te leh mi retheite tan phurrit chhawk zangkhaitu a nih thu sawiin, department hrang hrangah ZPM sorkar chuan ngaihnawm tham leh puitling takin hma a la mek zel tih a sawi.