Aizawl: Moromuri Tour Agency neitu Surita Chakma-in social media-ah Mizoram leh a mi chengte chungchang thu behchian dawl lo leh hnam hmuhsitna uchuak tak a sawi avangin Mizoram Tour Guide Association (MTGA) chuan he tour agency leh a neitu hi engah mah thawhpui tawh loh tur thu an sawi.

MTGA thuchhuah chuan Surita Chakma hian Mizoram chhunga eizawnga khawsa mek siin khawvel hmaah dawt hmangin Mizo hnam a timualpho a, hei hian an member-te thinlung a ti na hle a ni tih tar langin, Mizo te chu mikhual duhsak a, tawmngaihna leh zahngaihna ngai pawimawh hnam an ni a. Hnam diriamna leh tihmualpho tumna chu ngawih bopui mai mai an tum loh thu an tar lang.

MTGA chuan tun atangin Surita Chakma leh a Moromuri Tour Agency nen eng thawhhona mah an nei tawh lo ang a, an guide-te pawh an tour-ah an inhnamhnawih tawh lo va, hnam a pawimawh ber a ni tiin, “Kan hnam min diriamna leh min tih mualpho tumna hi ngawih bopui maia en liam mai mai thei kan ni lo,” an ti.

Hetihlai hian, Surita Chakma chuan interview social media-a darh mek chu hrehawm ti tak leh mi rilru tina a ni tih hriaa a thiltih dik loha mawhphurhna lain ngaihdam a dil a. Mizote inneih dan, eizawnna leh society-a an dinhmun a sawi tawhte leh Chakma-te hmuhsit anga a sawi chu mi mal tawnhriat pawh awm lo, tun hma lama an hrilh mai a sawi chhawng a nih thu sawiin, camera hmaa a sawite chu tihtawpsak tura ngenin Mizo mipui rilru natna lo tawk ta zawng zawngte hnenah ngaihdam a dil a ni.

Tlabung YMA-in an khuaa luh phal tawh lo

Podcaster pakhat nen an inkawmnaah Mizote chungchang dik lo leh mawi lo taka sawiin, a bikin Tlabung khaw hming tichhe zawnga thu dik lo ngialngan a chhakchhuah avangin Surita Chakma-i chu Tlabung Branch YMA chuan Tlabung leilung rap tawh lo turin an hriattir.

Thawhtannia thuchhuah an siamah Tlabung Branch YMA chuan, Surita Chakma-i’n Tlabung damdawi inah Chakmate en hran anga a sawi chu dawt a nih thu tar langin, outpatient leh inpatient zinga tam ber chu Chakma an nih thu leh poor fund sum hmanna zaa 85 vel chu Chakma damlote tana hman a ni zawk tih an sawi a. Sangha man chungchanga Mizote inluling leh lawng khalh tiding thin anga a puhna pawh hnam hrang hrang tana kalphung fel tak hmanga innghahtir thin an nih thu leh emergency erawh kaltir mai an nih thu an tar lang bawk.

Hnam dang in luah phalsak lo anga a puhna chungchangah dan lova pem lut rinhlelhte chauh khuahkhirh an nih thu leh ama unaunu ngei pawhin Tlabungah in a luah mek thu an tar lang a, Mizote tihhmingchhiat tuma dawt hmang thinte chu pawi an tih thu sawiin, Surita Chakma-i chu Tlabung leilung rap leh tawh lo tura an ti a, amah anga Tlabung khua tihhmingchhiat tumtute chu a tawp thlengin an do zel dawn thu an sawi bawk.