Aizawl: Assam Rifles (AR)-ten Aizawl khawpui laili an chhuahsan hnua an ram hman zui dan tur reltu, Advisory Committee on AR Land te chu Thawhtanni khan Chief Minister Lalduhoma hovin CM Conference Hall-ah an thukhawm a, an hmalak mekna thlirletin an hmachhawp pawimawh zualte an sawiho.
Chief minister hova thutkhawmah Aizawl Square tur chu a kual chhuaka footpath siam leh a tlang chu rawt hniam deuh tura tih niin, thing kih ngai a awm a nih pawhin a aia tam Mizoram thing mawi zawk phun zawk tura ruahman a ni. Tuna Aizawl Spine Road meter 14-a tihzauh mek pawh mipui sawiselna a awm avangin a aia zauva zauh belh tha tiin, kawngko lung remte pawh khawpui timawi zawnga kalpui tura tih a ni bawk.
Mandir sawnna hmun tur chu Dak Inpui piah Open Amphi Theatre sakna tura ruahman hmun thlen phei hma deuha hmunawlah ruahman a ni a, chhuah lama bypass road laih mek, Saron venga a chhuah pheina tur, Baptist Kohhran Biak In hmun thar atan pawh Modern School ram hnung inkar chu ruahman fel tawh a ni.
Bypass road thar hnuai Bethlehem veng chunga forest area chu UD & PA lamin thing leh mau tichhe lova mipui lenvahna tura chei mawi an duan chu committee hian an pawmpui bawk a ni.
AR ram hmalakna hi March 17 khan Early Bird Project hawn lo ni tawhin, tunah hian hmun hrang hrangah hna hi thawh mek a ni.
Thutkhawmah hian K. Sapdanga (UD&PA Minister), B. Lalchhanzova (Revenue Minister), Lalnghinglova Hmar (Tourism Minister), Lalmuanpuia Punte (Adviser to CM), Chief Secretary Khilli Ram Meena leh member dangte an tel a ni.