Aizawl: Chief Minister Lalduhoma kaihhruaiin State Level Management Authority on Relocation of Neihloh Village-te chu Thawhlehni khan CM Conference Hall-ah an thukhawm a, leilung chhiatna laka khaw pum a him lo avanga khaw thar sahsak mek Neihloh khua a hmalakna hrang hrangte an sawi ho.
Thutkhawmah hian khaw thara insawn tur chhungkaw 91-te hnenah chenna in sakna tur 1st installment Rs nuai 5 leh 2nd installment Rs nuai 4 ve-ve pek an nih tawh thu leh installment hnuhnung ber pawh buaipui mek a nih thu sawi a ni.
He huna tar lan danin, khaw chhung kawng laih chu zawh thawkhat a ni tawh a, concrete pavement siam a nih hmain tui pipe phum ngaite phum fel hmasak vek ni tura tih a ni a, tui pipe pawh a tam zawk phum a nih tawh bakah tui pump-na tur pawh karleh lamah pump chhin theih an inbeisei thu sawi a ni.
Zirtirtu quarters sak zawh a nih tawh thu leh school building pawh sanction nghah mek a nih bakah, electric transformer bun fel a ni tawh a; Health Clinic leh Anganwadi hmunhma tur sum ruahman fel a ni bawk.
VC House sakna tur chu RD & AD lamin ngaihtuah se tiin, library, community hall leh ration semna tur dawr proposal duang turin Serchhip Deputy Commissioner (DC) chu tih a ni bawk.