Aizawl: MZP hruaitute chuan Mizorama ruihhlo tawlhrutute man chhuah beihpui ‘Operation Trident’ hlawhtling taka kalpui a nih avangin Thawhlehni khan Home Minister K. Sapdanga pisaah home department lawmpuina an hlan a. Home minister chuan ruihhlo tawlh rutute chu tlawmngai pawlte nen tang tlanga umzui zel an tum thu a sawi.
Operation Trident hi ruihhlo do beihpui thlakna a nih satliah loh thu leh ruihhlo hralh ruk leh tawlh ruk dan a hnuk thleng a chhut chahna tur beihpui a nih thu home minister chuan sawiin, state force-te tih theih loh chinah central agency hrang hrang Narcotic Control Bureau (NCB) leh Enforcement Directorate (ED)-te hmanga ruihhlo tawlh rutu liante man a nih tak avangin khawchhak lam atanga ruihhlo rawn lut pawh a hniam ruih tura an ngaih thu a sawi.
Khawchhak atanga ruihhlo rawn lut a reh diak lo pawhin a silawng viau tura an ngaih thu sawiin K Sapdanga chuan, “Kan hlawhtling ta tiin kan thu mai dawn lo. Ruihhlo tawlh rutute hi kan thlir liam dawn a, tlawmngai pawlte nen tang tlangin kan umzui chho zel dawn,” a ti.
Ruihhlo hian zirlaite a khawih nasat ber avangin MZP-ten hei hi an vei chu lawmawm a tih thu sawiin K Sapdanga chuan, YMA, YLA leh M|P-te pawhin ‘Ruihhlo Do’ kum an puan mek thu sawiin, sorkar, tlawmngai pawl leh kohhrante tanrualna hmangin ruihhlo chu an tukzal ngei an beisei thu leh a tul chuan central agency-te hnena la zualko leh mai an inpeih thu a sawi bawk.
MZP President Dr C. Lalremruata pawhin thu sawiin, Mizorama ruihhlo a hluar em em kara home minister kaihhruaina hnuaia police-te hmalakna ropui an tih avanga home department pum anga lawmpuina hlan an nih thu a sawi.
Middle school zirlaite thlenga ruihhlo kengtu atan an hmang tih an hriat phei chuan an rilru a nat thu leh MZP Assembly neih zawh takah ruihhlo do chu agenda atan an pawm tak avangin, dan kengkawhtute nen tangkawpa zirlaite zingah a that lohzia inzirtirna neih an tum thu Dr C. Lalremruata hian a sawi bawk.
He hunah hian Home Minister hi IGP H. Ramthlengliana, Aizawl SP Zosangliana leh CID (SP) Stephen Lalrinawma ten an tawiawm a ni.