Aizawl: BJP Mizoram General Secretary Delson Notlia chuan India ram democracy humhalhna, electoral system dikna leh danpuiin a siam institution-te vawng him tura ram pum huap hmalakna hrang hrang laka Congress leh eptu party-te chezia chu pawi an tih thu sawiin, Special Intensive Revision (SIR) chungchanga thu dik lo theh darh a ni thin chu demawm an tih thu a sawi.
Thawhlehnia Aizawl Press Club-a thuthar thehdarhtute a kawmnaah Delson Notlia chuan, ‘Save Democracy, remove Anarchy – Citizens for Democracy’ campaign hnuaiah BJP chuan inthlanna thianghlim leh rintlak a awm theih nana Election Commission of India (ECI) hmalakna ram pum huap Special Intensive Revision (SIR) chu nghet takin an thlawp tlat tih a sawi.
SIR hi tun sorkar siam thar thut a nih loh thu sawiin, Independent India-ah 1952 atanga 2025 inkar khan tum 12 zawk neih a nih tawh thu leh chung tum 12 zing a tum 10 chu Congress sorkar hnuaia neih a nih thu a sawi a. Congress sorkar laia danpui leh administrative hna dik tak anga hmanga, tun sorkar thara a taka kalpui a nih taka democracy beihna anga an chhuah thut hi Congress hmai hnih neihzia chiang taka tilangtu a nih thu a sawi bawk.
BJP general secretary chuan SIR hi electoral roll a dik lohna te zawn chhuah tam ber chu hming inziak nawn, mi thi tawh hming, hmun danga pem hlen leh voter record dik lo thian fai tura tih a nih thu a sawi a. Eptu party-ten vaibelchhe 13 zet voter paih bo nia an sawi chu mipui hruai sual tumna a nih thu sawiin, heng zinga vaibelchhe 6.3 (48.1%) hi hmun danga pem hlen, vaibelchhe 3 (22.9%) survey laia awm lo, vaibelchhe 2.8 (21.4%) thi tawh leh vaibelchhe 1 (7.6%) hming inziak nawnte an nih avangin voter dik tak paih bo tumna a ni lo tih a sawi.
Congress tlakhniamna chu tun SIR hmalakna avang a ni lo tih sawiin, 2014 atanga 2025 inkar ringawt pawhin state assembly inthlan vawi 56 ngawt an hloh tawh thu leh state eng emaw zata chief minister an neih lohna pawh kum 25 atanga 50 a tlin tawh thu a sawi bawk.
Delson Notlia chuan BJP in SIR dodalna political protest thenkhatte kal dan chu a ngaimawh hle tih sawiin, “Politician thenkhat leh pawl hrang hrang ten an thu sawiah regime change thlen duh ni awm ang hrim a mipui te an fuihpawrh chu tha a ti lo hle. Protest-tu thenkhat leh political group thenkhatten election commission leh danpuiin a siam institution dangte rin tlak lo ang a lantir an tum hi a manganthlak hle,” a ti.
BJP chuan protest hming hmanga election commission leh Supreme Court thlenga, law & order tichhe zawnga tharum thawhna leh official-te vauzam tumna thleng pawh a ngaimawh tih a sawi a. Mipui rawngbawltu election official-te, police leh hmeichhe officer-te laka tharum thawhna leh vauzamna hmun a awm loh thu leh ram pawn atanga sum lut hmanga rorelna tihbuai tum political campaign leh dan lova lut ru awm thinte chu ram venhimna leh inthlan thianghlim atan thil hlauhawm tak a nih avangin mipuite chu democratic institution-te humhalh tura tan la tlat turin a ngen a ni.
Nilaini hian BJP Mizoram chuan ‘Democracy humhimna la, Rorelna dik lo tibo rawh’ tih thupui hmangin, chawhma dar 11-ah Zarkawt Kawn-ah ah kawng zawh bul tanin Vana Pa Hall kawt-ah hun tawp an hmang dawn a. He hunah telpui turin mi zawng an sawm a ni.