Carlos Tevez-a chuan Manchester United hmelma, Manchester City a zawm chhan chu Old Trafford-ah a laka thutiam bawhchhiat a tam em vanga phuba lak duhna vang niin a sawi.
Tevez-a hian a hun laia Premier League chanchina insawn hmingthang ber pawl a hlen chhuak a, kum 2009 khan United chhuahsanin City a pan.
Argentina international player hi United-ah a hlawhtling hle a, league nomawi pahnih, League Cup pakhat leh Champions League a la hman.
United chuan Tevez-a hi kum hnih chhung atan loan-in an la a; mahse, a ngheta a cham zel dan tur chungchangah thutiam hlen loh a awm tak nual avangin Old Trafford a chhuahsan niin a insawi.
A khelhpui thin, Rio Ferdinand-a hnenah Tevez-a hian an coach, Sir Alex Ferguson-a’n a thutiam a bawhchhiat hnuah an inkungkaihna a chhia tiin a sawi.
Kum 2009 khan Tevez hian City a zawm a, vawi 148 a khelhah goal 73 thunin, 2011-12 khan a Premier League nomawi pathumna a la a. Nomawi an lak lawmnaah hian ‘RIP Fergie’ tih banner a bat nghe nghe a ni.
A chet dan chungchang sawi fiahin Tevez-a chuan United tantute pawhin a thutlukna chu an hriatthiam a beisei thu a sawi.
“Kum hnih chhung loan-in min la lut a, a hnuah ka khelh that chuan kum khat hnuah a ngheta min lak a tum thu min hrilh a. Fergie khan ka hnenah ‘tunah chuan i contract ka puitlin dawn ta a, Manchester-ah i awm zel tawh ang’ a ti a, a tak ram a thleng thei ta lo a, kha vang khan ka thin a rim vangin phuba lak nan tiin Manchester City kha ka zawm ta daih a ni,” tiin a sawi.