Aizawl: Association of Tour Operators Mizoram (ATOM) chuan tun hnaia vantlang hmuha thu belhchian dawl lo hmanga Mizo mipuite tihmingchhia leh inhmuhsitna thu sawitu, Surita Chakma leh a agency MuroMuri te membership an hlihsak a. Mizoram sorkar tourism department hnenah an license tihtawpsak turin a ngen.
Nilainia an thuchhuahah ATOM Executive Committee chuan Surita Chakma leh a agency te public broadcast-a Mizo hnam demna leh inhmuhsitna thu an sawi chu administrative leh ethics bawhchhiatna lian tak a nih avangin, an pawl dan Association Memorandum of Association Clause 4/B/a/v zulzuiin he hremna hi a lekkawh a ni.
Member an nihna hlihsak a nih rual hian ATOM chuan heng entity-te nen hian an thawhhona zawng zawng a tihtawp rualin, tourism partner-te leh hotute hnenah advisory thawnin inzawmna nei tawh lo turin a hriattir nghal bawk.
Mizoram tourism hmasawnna chu remna, inpumkhatna leh Mizo zawng zawngte zahawmna leh nunze mawi tak tichiangtu a ni tih tar langin, ATOM chuan he a thiltih hi thlawp turin Mizoram sorkar Tourism Department hnenah Mizoram tourism ecosystem himna leh hmasawnna humhalh zel a nih theih nan Surita Chakma leh a agency MuroMuri te tour operation license chu tihtawpsak turin ngenna a thehlut nghal a ni.
ATOM chuan ram muanna leh hnam zahawmna tibawrhbang zawnga chete lakah tu mah dim lovin disciplinary action khauh tak lak a nih zel tur thu leh, industry chhunga an thawhpuite zawng zawng pawh hnam zia leh inzahtawnna vawng nung zel turin a ngen bawk.