Aizawl: BJP Mizoram chuan Nilaini khan Aizawl-ah ‘Save Democracy Remove Anarchy’ tih thupui hmangin kawngzawh an huaihawt a, he kawngzawh hi Zarkawt Traffic Point atanga tanin Vana Pa Hall kawtah kharna inkhawm neih chhunzawm a ni.
Vana Pa Hall kawta kharna inkhawmah hian Mizoram BJP In-charge Bhagwat Karad leh State President Dr. K. Beichhua, MLA te’n thu an sawi.
Bhagwat Karad chuan Prime Minister Narendra Modi kaihhruaina hnuaiah hmarchhak state-te leh Mizoram bik chu sorkar laipuiin a ngaihsak tak zet tih sawiin, Bangladesh ramri-a fencing siam mekte pawh dan lova lo lut tura vengtu pawimawh a nih thu a sawi.
Kuthnathawktu, a bikin sawhthing chingtute leh thalaite hna zawnna kawnga harsatna awm mekte sutkiansaka market zau zawk siamsak turin sorkar laipui lamah theihtawp a chhuah tur thu a sawi a, kum 2028-a Mizoram inthlanpui lo awm tur atana inbuatsaih nghal turin mipuite BJP thlawp turin a sawm bawk.
State President Dr. K. Beichhua pawhin thu sawiin, SIR kalpui a nih avanga Mizorama voter 30,000 (3.89%) chuang paih takte chu dan dik taka kalpui a nih thu leh, heng zingah hian BJP voter tam tak pawh an tel ve thu a sawi a. “Heng vote paihte hi a then chu hmun danga pem te, mitthi tawh leh hmun khat aia tam a vote neite an ni,” a ti.
Dr K Beichhua chuan SIR hi Congress sorkar hun laia dan siam zui tak a nih thu leh, vote dik tak chauh a awm theihna tura dan zawm a nih laia Congress party ten dawt hmanga an puh hmingchhiat tumna chu an duh loh thu sawiin, “Vawiinah hian democracy hum him a tharum hmanga sorkar paih thlak hi kan do tlat a, democracy ang ngeia, mipui duh thlanna hi kan zah tur a ni a, chutiang humhim chu BJP chuan kan tum ber a ni,” a ti bawk.