MPCC chuan tun dinhmunah ZPM sorkar chu Mizoram sorkar leiba tihhniam leh sum leh pai dinhmun siamtha thuai turin an phut tih sawiin, kumin 2026-2027 sorkar budget Rs vbc 17,076.92 a nih laiin state leiba erawh Rs vbc 19,085.15 zet thleng chho in, budget aia leiba Rs vbc 2,008.23-a a tam zawk mek tih sawiin, “ZPM party sorkarin Mizoram chu ba hmunah a siam mek a ni,” an ti.
Nilaini-a Aizawl Press Club-a thu thar thehdarhtute an kawmnaah MPCC Publicity Board Chairman PC Laltlansanga chuan, ZPM party hian sorkarna an chan hmain leiba tih tlem leh sum puk tih bo chungchang uar takin campaign laiin puang chhuak thin mah se, sorkarna an siam hnuah intiamna hlamchhiahin sum enkawl thiam lo ber leh bat huai ber sorkarah an chang zawk tih a sawi.
Kumin 2026-27 kum kal mek April atanga October chhung ringawt pawhin Rs vbc 6,119.84 sorkar hian a puk hman tawh a, hei hi 2025-26-a sum puk tling khawm Rs vbc 5,308 ai pawhin a tam tawh zawk a. Sorkar leiba hian Mizorama mihring awm zawng zawng chawhrualin nausen nen thlengin mi pakhat zelah Rs 1,45,000 vel theuh leiba nei ang an nih tawh thu a sawi bawk.
MPCC General Secretary ni bawk PC Laltlansanga chuan, kum 2008 atanga sorkar hrang hrang sum puk leh leiba neih chhoh dan chawhrualin, Congress sorkar kum 10 (2008-2018) chhunga sum puk chu kum khatah chawlhrualin Rs vbc 2,040.737 leh leiba kum khatah chawlhrualin Rs vbc 541.19 a nih laiin, MNF sorkar kum nga (2018-2023) chhungin kum khatah chawlhrualin sum puk Rs vbc 5,954.44 leh leiba Rs vbc 1,464.54 a tling chho a. Hetih lai hian ZPM sorkar kum thum (2023-2026) chhung hian kum khatah chawhrualin sum puk hi Rs vbc 6,876.89 leh leiba hi Rs vbc 2,730.02 zetin a sang tih a sawi.
Thalaite hnena an ‘CM Special Package’ an intiam pawh duhsak bik awm lo tur ti mah se, ZPM party mi leh sate chauh dawng thei tura an rel tak avangin an thu tiam hlamchhiahah puhin PC Laltlansanga chuan, “Sorkar hian sum puk tam viau mah se khawlaiah sum lengvak a tlem em em thung a, sumdawngte thlengin mangang leh Krismas boruak thlengin huphurhawm khawpin mipuite an intawrh tir a ni. Restricted tender leh departmental works hmanga mahni duhsak zawngte hnena contract hna sem vak vak bansan tur leh, sum puk tam tak awm si a mipuia sum lengvak a tlem chhan sawifiah ngei turin ZPM sorkar hi kan phut a ni,” a ti.