- Lalhruaitluanga Chawngte
A rei tawh mai – naupang nawi mai ka la ni a, chhaih rual – lehkhachaih chaih rual ka ni, chung lai chuan.
Ka pa bulah ka thu tung a, ka thu naran a ni lo, che lova awm thei lo, chutiang rual chu ka ni a, ka pa chu ka tibuai hle.
Ka pa khan lehkhachaih a siam a, ka ta tur. Ka nghakhlel em em a, hmuhnawm ka ti em em bawk. Ka thu hlei thei lo a, ka bawkkhup thul, ka thingthi thul. A siamtu aia ka en hnaih thin avang khan ka tibuai a, thu hla deuh turin min ti thin. Ka’n tawlh sawn ve ngei a, mahse ka ti hriau hriau a, ei ka tum emaw tih tur khawpin ka pa thil siam chu ka lo hnaih leh thin.
Ka tangkai lo em em chungin ka pa khan min hlimpui tho niin ka hria a, ka’n ngaihtuah let pawh hian min hlimpui hian ka hre tlat. Kan pafa khan kan hlimin ka hria a, a chang phei hi chuan kei aiin ka pa kha a hlim zawk te’n ka ring thin!
Rei ngial kan beih hnuah kan siam zo ta. Kan pafa chuan pawnah kan inkeng chhuak nghal a, ka lehkhachaih chu mi lehkhachaihte ang bawka thlawhtir ve kan tum ta a ni.
Kei kha ka tangkai lo em em mai a, a lehkhachaih kengtu atan emaw a hrui kengtu zawk atan emaw khan ka hmantlak loh ve ve, ka pa kha a buaiin a indaih lo ve khawpin ka ring. Kawng zawl thui ang reng taka che vel kha kan ni a, ka pain ti tura min tih angin ka tlan ve tarh tarh kha a ni a!
Bei bei ta chu, eng tin tin emaw chuan kan chaih thlawk ve ta a, ka lehkhachaih chu van sangah a leng ta delh delh mai a ni. Kan va han hlim dun tak!
Ka pa siam sa, a chaih thlawh sa chu ka’n chaih ve a, a chang leh a hrui te chu ka’n hlum, a chang leh ka’n phelh leh thin. Kha lehkhachaih kha he khawvela ka thuhnuaia kun hmasa pawl tak chu a ni ang.
Hun engemaw chen chutia kan chaih hnu chuan kan duhtawk ta a, van sang atangin ka lehkhachaih chu kan hlum thla ta a ni.
Tichuan, ka pa chuan a’n hnim vel a, “E! Van rim a nam chek mai,” tih pahin “Han hnim ve chhin teh,” min ti a, ka hnim ve ta a nih kha.
Phur takin ka’n hnim a, ka pa chuan min lo zawt, “Van rim a nam em?” tiin. “Aw,” tiin ka chhang a, khami tum khan ka lu pawh ka bu nghat nghat mai awm mang e, ka ti.
Ka pa’n van rim a nam a tih chuan van rim a nam a ni mai.
Kan haw a, ka nu pawh hlim em emin ka hrilh nghal – ka lehkhachaihin van rim a nam thu kha.
Ka lehkhachaih kha ka hrechhuak thin – a siamtu vang khan.