Zaithiam lar Rebecca Saimawii chuan a naupan lai atanga a puitlin thlengin a pa nen vawi hnih chauh an inhmu a, an inhmuh chhung pawh darkar thum vel chauh a ni tih a sawi.
He thu hi Zonet programme, ‘Zonuni Nen Thingpui Sen’ a a inlannaah a sawi a ni.
Rebecca-i sawi danin, nu leh pa inkara seilian a ni lo va, a nu bulah Aizawl-ah a seilian a. A pa erawh Aizawl mi tho a ni a, a pu hnathawhna avangin Shillong-ah a awm thung.
A pa nen an inhmuh vawi khatna chu kum 10 mi a nih laiin a ni a, Shillong-a a pa hnathawhnaah a kal a. Mahse a la naupan deuh avangin a hre chiang tawh lo tih a sawi.
An inhmuh vawi hnihna chu kum 1982 vel a ni a, Information Department-in Sibsagar-a cultural event-a zai tura an tih avangin a kal a. A haw lamah Shillong-ah a pa hmuh duh avangin a cham a. Hetih lai hian a pa chu Police Department-ah Superintendent a ni.
Rebecca-i chuan, “Ka pa nen kan inhmuh chuan kan pahnihin kan tap a. Ka pa chuan ka nu nen an inneih loh avangin ngaihdam min dil a,” a ti.
An inhmuh hman chhung hi darkar thum vel chauh a ni a, kum hnih hnu velah a pa chu a thi zui ta a ni.
Rebecca Saimawii chuan a pa nen hun rei tak hmang dun lo mah se, a taksa leh thisenah rimawi thiamna leh rimawi hlutna hriatna a neih chu a pa hnen atanga a dawn a nih thu sawiin, a pa chungah a lawm em em tih a sawi bawk.