Angelina Jolie leh Brad Pitt fate zinga a palina ni turin Viviennne chuan a hming tawpa a pa hming a chhawm chu official in a paih veleh ta.
A hmain a unaute Zahara Marley Julie leh Maddox Chivan Jolie te chuan an hming tawpa a pa hming awm hi an lo paih tawh bawk a. September thla khan Vivienne hian dan hmanga paih a duh thu thuneitute hnenah thlenin, court chuan kartir khan phalna an pe ta a, Vivienne Marcheline Jolie tiin a hming a thlak zui ta bawk.
Kuminah tho a hmasa ber ni turin Shiloh Jolie chuan a hming tawpa a pa hming a chhawm chu official in a lo paih hmasa ber tawh a, ani phei hi chuan a school kalna lamah August 2024 atang khan a lo dah bo tawh a, dan hmangin kuminah khan a paihfel veleh ta chauh a ni.
Tunah hian an fate paruk zingah phir te chiahin an la thlak lo a, phir zinga pakhat zawk Knox chuan dan hmanga thlak a duh thu a la sawi lo a, June 2026-a a high school graduation lehkhaah pawh a pa hming hi a la dah nia tarlan a ni a, a phirpui Pax pawhin a pa hming hi a la dah ngar ngar rih bawk a ni.
Ziah tawh thin angin Jolie leh Pitt te hi Mr. & Mrs Smith movie an chan dun atanga intawng chho niin, hetih lai hian Pitt hi Jennifer Anniston nen an la inneih lai a ni a, an inkar thu chhe zuiin, an inthen hnu lawkah hian Jolie nen an inkawpzui nghal.
Innei lova rei fe khawsa dunin, Jolie leh Pitt hian an fa lakte nen fa paruk an nei hman a, mahse rei daih zui leh ta lovin inthenna lehkha an thehluh hnu December 2024 khan dan hmangin an inthen fel veleh ta tho a ni.