Israeli President Isaac Herzog-a chuan kar hmasaa an ram inthlanpui result a dawn hnuah sorkar thar siam dan turah political party-te a dawr tan.
Herzog-a hian party hruaitute chu inthlan that an duh lo a nih chuan ‘intiamna leh tih tumte tih vek theih a ni lo’ tih hre turin a chah.
Prime Minister Benjamin Netanyahu-a kaihhruai tangrualin inthlanah hian hnehna an chang lo va, an khingpui, Gadi Eisenkot pawh an chak bik lo.
Netanyahu-a kaihhruai lamin Arab-te kaihhruai party-ten inthlan an ‘tichingpen’ nia an sawi chu inthlan hotute chuan finfiahna a awm lo va, result tihchhuah tihkhawtlai phahna tur a awm lo tih an sawi.
Shin Bet security service-in ram inrawlh an awm tia sawina a chhui mek a; mahse, Central Elections Committee hotu chuan an thil hmuhin thil a tidanglam dawn lo tih a sawi.
October 27-a inthlanah khan Netanyahu-a kaihhruai right-wing Likud party leh far-right leh ultra-Orthodox Jewish tangrual chuan Knesset-a seat 120 awmah 53 an la a. Eisenkot-a kaihhruai centrist Yashar party leh Juda party pathum tangrual chuan 48 an la ve thung.
Arab kaihhruai tangrual, United Arab List leh Joint List chuan rin loh takin seat 19 an la ve bawk a. Hei vang hian thuneihna chang tur siam thei an ni mek a, hetih rual hian Juda party-ten inthlan hma khan thawhpui an tum lo tih an lo sawi tawh thung.
Israel-ah hian president hi thuneihna nei tak ni lo mah se inthlanah erawh Knesset member-te chu sorkar siam tura mi sawmtu a ni a, ni 28 hun pek an ni a, a tul chuan ni 14 pawh sei theih a ni.
Nilaini tuk khan Herzog-a hnenah hian Central Elections Committee Chairman Justice Noam Sohlberg-a’n Jerusalem-ah inthlan result hi a hlan a. Sorkar siam thei khawpa chak an awm loh avangin tlai atangin sorkar thar siam tura party rawn a tan zui.
“Inthlan that a awm loh nan leh Israel mipuite tan sorkar tha leh nghet din a nih theih party hrang hrang leh an aiawhtute chu kan tun dinhmun hrethiama an intiamna leh tih tumte tihhlawhtlin vek a theih loh tih pawm turin ka chah a ni,” a ti.
President hian Shin Bet-in ram dang inrawlh nia sawi a chhuina pawh a rintawk thu leh an hmuh chhuah nghak hram hram turin a ngen.