Kan chhehvelah hnam hrang hrang an tam hle a, heng mite nen hian kan la inchiahpiah zel pawhin a rinawm bawk. Mahse, kan ram min chuhpui zawnga khawsa thin an la awm fo hi a pawi a, kan finkhalh thiam ve a tul hle.
Heng hnam hrang hrangte hi a then chu mahni hnam hmasial taka kalte an ni a, a then erawh chu keimahni (Mizo) ang maia kan hnama lo intulut titih tawhte an ni bawk.
Kan ram leh hnam hi kan thlahte zel thlenga kan rochun tur a nih avangin kan humhalh thiam a, a chhiat a thatah mawhphurtu kan ni tih hi kan inhriatthar a tul a, kan venhim leh enkawl pawh a tul hle bawk.
Heng kan dek renga awm hnamdangte hi a then chu ram nei hauh lote an ni a, an thlahte zel tana ram neih leh hnutchhiah an duh avangin min nek a, min ei a, min tihchhiat hreh hauh lote an ni hlawm.
Chutiang kan nih avang chuan kan fin thiam a, kan harhchhuah a, kan ram leh hnam himna tura ke kan pen ve a, hnamdang laka awm dan leh dawnsawn dan kan thiam thar pawh a tul hlein a rinawm bawk.
Sorkar in a tih theih loh chin leh a tih rem lo chin tam tak a awm ang, chutiang a nih avang chuan kan tlawmngai pawl lian, a bik takin YMA leh MZP te hian hnamdangte enkawl leh nek dan an thiam thar a, min tihchhiat tumtute laka ke pen dan thar an hriat pawh a tul thei awm e. Hei lo hi ram kan nei lo a, a chhiat a thatah mawhphurtu kan ni tih inhrereng chungin kan ram leh hnam humhalh a, venghim turin theihtawp i chhuah zel ang u.