Aizawl: National Commission for Women leh Mizoram State Commission for Women (MSCW) te tangkawp buatsaih, kumtlinglo inneih khapna dan inzirtirna ‘Awareness programme on Prohibition of Child Marriage Act, 2006’ chu Ningani khan I&PR Auditorium-ah neih a ni a. Social Welfare, Women & Child Development (SW, W&CD) Minister Lalrinpuii chuan khuallian niin a hmanpui.
Social Welfare Minister chuan he awareness programme hi rilru zawng zawnga ngaithla tur leh ram pumah a tha lama nghawng a neih ngei a beisei thu a sawi. Inneihna chu mihring puitling, rilru leh taksa lama inpeih tawhte mawhphurhna a nih avangin kum tling lo te chu chhungkaw din tura mawhphurhna pek chi an la nih rih loh thu a sawi.
Dan hnuaia mipa kum 21 tling lo leh hmeichhia kum 18 tling lo te inneih chu phal a nih loh bakah inneihtirtute pawh dan anga hrem theih an nih thu a sawi a. Naupangte humhalh chu mi tin mawhphurhna a nih avangin sorkarin dan siam mah se chhungkua, kohhran leh khawtlang mipuite mawhphurhna a san em avangin theih tawpa inzirtirna neih chhunzawm a tul thu Minister chuan a sawi bawk.
Hawnna inkhawm neih zawh hian technical session neih zui niin, MSCW member Dr. Hmingthanzuali kaihhruaina hnuaiah resource person hrang hrangte’n kum tling lo inneih khapna dan, rilru leh hriselna a nghawng leh hmeichhe naupangte hmakhua humhalh nana mawhphurhna hrang hrang chungchangah zirtirna an pe.
He hunah hian MYC Chairman Malsawmzuala Ralte, MSCPCR Chairman Jimmy Laltlanmawia leh MSCW hotute bakah kohhran leh khawtlang hruaitute an tel a ni.