Aizawl: Indian Oil Corporation Limited (IOCL)-in revised Retail Selling Price an tihchhuah angin Mizoram chhungah eirawngbawlna gas (LPG) rate a bithliah thar chu November 1, 2026 atang khan hman tan nghal a ni.
FCS&CA Department thuchhuah angin, LPG distributor awmna khua Vairengte-ah chhungkuaa eirawngbawlna gas bur khat (kg 14.2) hi Rs 1,085 leh sumdawngte hman thin (commercial) bur khat (kg 19) hi Rs 3,302 a nih laiin, Vairengte tih loh Mizoram pumpuiah chuan chhungkuaa eirawngbawlna gas bur khat hi Rs 1,094 leh commercial cylinder bur khat hi Rs 3,317-a bithliah a ni.
Chutih rualin 19KG Xtra Tej hi Vairengte-ah Rs 3,324.50 leh Mizoram hmun dangah Rs 3,339.50 a ni a, kg 10 composite pawh Vairengte-ah Rs 777.50 leh hmun dangah Rs 787.50-a ruahman a ni bawk.
Sorkar thuchhuah tar lan angin AMC huam chhung leh district headquarters hrang hrangte bakah home delivery kalpui tawhna hmun dangah te chuan chhungkuaa eirawngbawlna (kg 14.2) rate tar lan atang hian home delivery charge atan Rs 70 belh zel tur a ni a, godown-a hralh a nih erawh chuan Rs 33.43 paih thung tur a ni.
Home delivery kalpui thei lova point delivery kalpuina vengah chuan Rs 7.53 belh thung tur a ni bawk.
Home delivery-a semah hian kg 10 cylinder-ah Rs 70 leh kg 5 cylinder-ah Rs 20 belh tura ruahman a ni a, distributor-te pawhin sorkar order tar lan tawh anga km leh pawisa chawi belh tur chhut rual hmangin an huam chhunga khuaah te LPG hi an sem thin dawn a ni.