Aizawl: MPCC President Lal Thanzara chuan politics-ah Pathian a inrawlh chiang hle a, politics-a Pathian a tel tih pawmtute tan dawt sawi leh dawta inkaihhruai a thiang lo va, dawt a tel thiang miah lo tih a sawi.
Ningania Kolasib-a Kolasib Block Congress-te tana Political Session a hmanpuinaah MPCC President chuan, MNF sorkar thil tiam NLUP Rs nuai 3 chungchang leh Independent sual laia dawt sawi tawh thin a nih thu a sawi a. Tuna ZPM sorkar pawhin VIP culture ti-bo anga insawi si leh dawt hrang hrang hmanga mipui bum, restricted tender hmanga contract hna tam tak inpek leh corruption thlengin an zui mek a ni, a ti.
Chuhvel khuaa Chief Minister Rubber Mission-ah pawh mi rethei te khaichhuahna tura sorkar buatsaih a nih laia Chief Minister leh a changtu Minister te’n an lo chang ve duh hi an awh a te lutuk tih sawiin “Mi rethei chanai an chhuhsak a ni,” a ti.
Lal Thanzara chuan Pathian khawngaihna a zarah kum 2028 inthlanah chuan Congress party chuan ram, hnam leh sakhua himna atan sorkarna an siam ngei a rin thu a sawi.
He hun Kolasib Block Congress Committee President HP Lalfamkima kaihhruaiah hian MPCC Treasurer Dr. Lalmalsawma Nghaka pawhin thu a sawi bawk.