Aizawl: Mizoram State Project Monitoring Committee (MSPMC) member-te chuan Khawzawl Darngawn-a Eklavya Model Residential School (EMRS) sak mek chu a hmunah Ningani khan tlawhin, building hrang hrang leh an hmanrua hmante uluk takin an enfiah vek.
MSPMC Secretary Er. Lalthanzuala Ralte hoin Architect George Lalzuia, Er. H. Laldintluanga, Dr. C. Lalremruata, Prof. Chawngsailova, Vannunmawia leh Joshua Thangliana te chuan a hmunah contractor leh ZIDCO aiawhte kawmin, hnathawh thlen chin leh hmachhawpte an sawi ho nghal a ni.
MSPMC hotute chuan hna a hun taka zawh a nih theih nan Project Management Plan mumal tak siam a pawimawh thu sawiin, hnahthawktuten hmanrua an mamawh hun taka an neih theih nan hma la turin contractor-te an chah.
Khuarel chhiatna leh chhiatrupna thleng pawh dawlzo building him sak leh pianphunga rualbanlote tana harsatna awm lova thleng/pan theih tura hmunhma siam an ngaihpawimawh thu an sawi.
EMRS hi Ministry of Tribal Affairs (MoTA) hnuaia tribal naupangten a thlawna zirna tha an dawn theihna tura sorkar laipui hmalakna a ni a. Khawzawl EMRS hi MoTA fund Rs 47,05,77,088 senga sak niin, Aizawl contractor Zothan Creation te’n October 13, 2025 atang khan hna thawk tanin October 13, 2027-a sak zawh tura ruahman a ni.
ZIDCO lamin uluk taka an vil mek school campus-ah hian basketball leh volleyball court, field, mipa leh hmeichhe hostel bakah thawktute quarter-te a awm vek dawn a ni.