Larsap chenna, Lok Bhavan hmar lam gate-a Sentry Post-a duty CRPF mi leh sa, Sudhir Swami (31) chu Ningani chawhma dar 10:20 vel khan a duty-na hmunah a service silai, AK-47 hmangin a inkap hlum.
Thudawn danin, Rajasthan-a Jaipur mi, Sudhir Swami hi CRPF 225 Battalion-a Sub-Inspector (General Duty) a ni a. Ningani khan Lok Bhavan hmar lam gate duty-na chair-a a thut laiin a silai hian a kaah inkapin, a hliam tuar lovin hmunah a thi nghal a. Thil thlen hnu hian hriattir an nih angin Forensic Science Laboratory (FSL) hotute chuan a thlenna hmun hi endikin, nimin vek khan Civil Hospital, Aizawlah a ruang hi post mortem niin, Zirtawpni hian an khua Jaipur district, Rajasthan panpui tum a ni.
He thu buatsaih lai thleng hian a inkah chhan hriat la ni lo mah se, police-te chuan a silai leh mobile phone te chu chhuina atan la khawm zuiin, Aizawl Police Station-ah unnatural death case ziah luh a ni.
Nupui fanau nei lo leh kum khat lai Mizorama awm tawh Sudhir Swami ruang hi a chhungte hnena thawn haw dan tur ruahmanna chu CRPF hotuten an buaipui a ni.