Aizawl: Home Minister K Sapdanga hovin Ningani khan Krismas leh Kumthar vuakveta boruak muanawm tak a awm theihna tur leh zu leh ruihhlo do dan tur chungchang a pisa-ah an sawiho.
Thutkhawmah Excise & Narcotics Minister Lalnghinglova Hmar, home department, excise & narcotics department, AMC, Aizawl DC leh Central YMA aiawhte an tel.
Home minister chuan Mizote hunpui boruak muanawm a awm nan police, excise, CYMA, DC leh AMC-te tanrual a ngaih thu leh an thawhhonain rah tha a chhuah ngei a rin thu a sawi.
Excise minister chuan ruihhlo dona kawnga tanrualna leh Operation Trident bultumin ruihhlo zuar liante man an ni chu lawmawm a tih thu a sawi.
Thutkhawmah hian Mizoram Police pawhin hunpui vuakvet atan Operation Peace Christmas & New Year leh Operation Jericoh 2 kalpui an tum thu sawiin, Aizawl chu zone li-ah thena sector 18-a duty tura ruahmanna siam a nih thu Aizawl SP-in a sawi bawk.
END Commissioner Z Lalhmangaiha pawhin hunpui laiin hnathawkte chawlh lak an khap thu a sawi a ni.
Muanawm taka hunpui hmang turin Central YMA leh AMC-te pawhin sorkar ruahmanna an thlawp dawn thu leh tan lak an inhuam thu sawiin, meeting chuan hmun lunlaite chhun zan zawma ven uluk leh Winter Festival vuakveta himna ngaihpawimawh zual a tul tiin hma latu tur commitee a din nghal a ni.