Aizawl: ZPM sorkarin finance department kaltlanga pensioner leh family pensioner, kum 60 chung lamte Aadhaar card kenga khawlaia intlar put ngai khawpa an kokhawm chu MNF chuan intham lohna leh an dikna chanvo palzutnaa ngaiin pensioner-te laka an hmalak danah hian ngaihdam dil turin sorkar an phut.
He thu hi Nilaini khan MNF PAC member Er. K. Lalsawmvela’n Aizawl Press Club-a thu thar thehdarhtute hmaah a sawi.
Er. K. Lalsawmvela chuan November 2026 chhunga Treasury Officer hnena anmahni ngei inlan tura tih an nih avangin tar chak lo leh tiang hawl ngai tawhte nen lama khalh khawm luih an ni a, hetiang thil hi Mizoram leh state bakah khawvel hmun dang pawha la thleng ngai lo a ni, a ti.
Pensioner-te awlsamna turin sorkar laipui leh state dang ten Jeevan Pramaan portal, Face Authentication technology leh Doorstep service te thlengin Ministry of Personnel, Public Grievances & Pensions bultumin tunah pawh ram pum huapa Digital Life Certificate awlsam taka theh luhna tur an chhawp chhuah mek lai a, an thatlai hun zawng zawng sorkar tana lo hmang tawhtu pensioner te hi ram tan an hlu a, zah leh chawimawi an phu tehreng nen ZPM sorkarin kawngpui dunga ni sen sa leh boruak lum kara physical parade a neih tir mai hi hmuh hrehawm an tih thu leh, zah leh chawimawi phute palzutna a ni, a ti bawk.
MNF chuan dik lova pension la an awm lohna tura hmalak hi sorkar tih tur pangngai ni mah se, sorkar laipuiin technology changkang zawk a chhawp chhuah mekte hmang lo va, pensioner-te chunga dan piah lama kherkhiap taka ruahmanna siam chu rang taka titawp turin sorkar hi an phut a ni.