- Dr J.T.V.L. Ngheta,
ADVOCATE
Thil dang tih tur ka neih bawk avangin kar hmasa Nov.6; 2026 khan Aizawl North Treasury office-ah ka han chho a, first floor-ah pensioner-te in tur thingpui sen hâng an lo chhawp a, thut hahdamna tura an ruahman, thutna nuam tak awmna room-ah thiante nen thingpui no keng lutin kan chawl a, office ka dawrah chuan a awlsamin a la hahdam ber âwm e.
Hetiang hian office tinah tun atang chuan senior citizen-te in tur lo chhawp zel thei se, a tihzia phian maithei, chawh rual pawhin kum 60 ral kai office dawr chu tih tham an ni âwm si lo va, office pawisa a hek tham lo vang a, upate zahna leh ngaihsakna entirna a ni dawn a, hnam dang rawn zin (tourist)-ten hmuh nuam an ti ngawt bawk ang.
Thil dik lo tih dik tumna lama upate ni hnih khat ni sa an lo tuar palh a nih pawhin khatiang kha hriat reng ni lo sela, Treasury-a thawkte emaw, Finance Deptt lam duh thu sam emaw a ni bik hauh lo vang; hetiang hi an vawi khat buatsaihna a ni a, a tir lamah engkim duh thu sama tih vek kha a theih loh ve bawk ang. Chutih laiin, opposition party pakhatin press conference nen meuh, pensioner-te ni saa an intlar thlavang hauhna an rawn au chhuahsak erawh kha chu a tha reng mai.
Kan hriat angin, Mizoramah hian dik lo taka family pension la an lo awm thin avangin hei hi tih tawp tumin Sorkarin hma a la a, chumi a hma lakna kal zelah khan, a dik sa, a tuate pawh, pensioner hrim hrim in-report a ngaih vanga Treasury office-a kal chu kan ni hlawm a, thil dik lo titute avangin senior citizen-te chuan hun leh tha sengin, mahni in leh lo kan chhuahsan hlawm chu a ni a; ministry kal tate khan an lo en liam mai mai si a. Thil siam that duh tan chuan vawi khat buai hat hi chu awm tur a ni rêng a ni.
Family pension la tur emaw, pensioner ni tur emaw hi an la rawn chhuak dawn chauh a, tul lo taka Treasury office-a upate inlan a ngaih tawh loh nan theih tawp chhuahin digital platform emaw hmanrua eng emaw, i.e., ITC chakna hmangin tih ni tawh sela; tun atang chuan, VCP kan ni emaw, LC chairman/president kan ni emaw, YMA hruaitu kan ni emaw, kohhran ziaktu kan ni emaw, ka nupuiin family pension a lak theih nan tih avanga mahni leh mahni thi anga inziah ang chi (awm thei)phei hi chu a rapthlak lutuk a, pumpelh ngei ngei chi a ni tawh e!
Kawng leh lam ngaihtuah chuan, Mizoram hian State dangte emaw, ram pawna changkanna ang tak tak nei turin State kan nih hnu hian kan la bei lo va, kan politician-te thiamna, hnam hmangaihna leh diknain a tlin loh vang chu a ni teh rêng ang a; chutih laiin, kan bureaucracy/ permanent executive hi a fit tawk loh vang tih i ring ngam bawk ang u; Regular Recruit (UPSC CS Exam)- AIS leh Central Service Group ‘A’ kan tlin tawh lohna a rei tawh êm hi; Sawrkarin hma sawnna hna a thawh chak poh leh bureaucratic inefficiency hi kan hmu zel ang (Fiance Deptt-a Central Service ‘ICAS’ mi thiam, chak leh duhawm tak ang hi 10 vel tal Mizoram sawrkarah hian awm thei sela chuan State admn hi a chak deuh vang chu); MPSC chungchanga kan MZP unaute hma lakna pawh hi chu a ve chauh a ni thei; UPSC direct recruit IAS leh Central Service Group ‘A’ tlin theih tawh lohna provincial administration; behaviour & process hi a chak zel kan ring em ni, literacy pc sàn berna State-a chengte hian ? State dangte hma sawnna leh ram dangte hma sawnna kan um chak poh leh kan State bureaucracy & Civil Service chak lohna kan hmu zel ngei dawn lo’m ni, eng nge a chhan? UPSC-in kum tin CS a buatsaih laia MCS, MPS, MSS leh organised service dangte service rules kum 1988 atanga (departmental officer-te hlamchhiah sia), uchuak taka kan tih thatsak zel (injustice to the departmental officers belonging to 30 departments ) hi a rah chhuah zinga pakhat a ni lo’m ni, kan tuar dawn chauh lo’m ni? Chutih laiin, organised service rau rau (‘ro ro’ ni loin)-ah pawh thenkhat , i.e., MIS, etc chu Secretary level thlentir an phalsak lo ang lawi a! Thalaitena UPSC, SSC leh State pawn hna ruak beih an chak loh rawih phah khawpa State chhunga organised service tam berte service conditions kan tih that hi chu kan la tuar dawn chauh a ni. Helam hi chu paper hrana la ziah ka tum avangin ka duh tawk mai ang e. A tawi zawnga sawi chuan, kan ministries kal tawh thenkhatte chet dan hi (in administrative parlance) “uiin a luak a ei leh thin” an tih ang hi a ni ber a; tuna sawrkar hnathawkte awm dan leh nih dan phung kan neih (personnel and administrative structure, service conditions, process, behaviour & hierarchy) hi a hlawm lian ‘the main structure’ chu State kan nih hnua chher/siam chhuah vek a ni si a. ZPM Ministry-ah pawh hian bureaucratic setup siam that kawngah chuan thil danglam hmuh tur a awm lo mai ni lovin kan neih sa leh kan awm mekna (status quo)ah an lung awi tih a hriat a, Sawrkar kal tate kawng an rawn zawh mek e; PS atana MCS an hman deuh vek atang hian chiang thawkhat; eng mah danglam (administrative structural transformation) hmuh tur emaw, tumna emaw a awm lo a ni. Mizoram house hrang hranga departmental officer-te dah tumna phei chu hla takah a awm a ni ringawt mai; kawng lehlama thlir chuan, tuna kan kal dan aia tha zawk tuk chhuah hi chu kan thluakin a tlin lo te pawh a ni ang a, chan tawka lung awi zir zel te pawh a ngai dawn chauh a ang hle, kristian kan ni alawm.