Ticket to Hornbill 2026 grand finale hmuhnawm tak neih zawh takah Mizoram atanga tel, Mizo band member paruk awmna — TERAT — chu pakhatna an ni.
India ram pum huap band intihsiakna lian ber — India’s Biggest Band Battle — ti hiala an sawi hi November 6, 2026 zan khan New Delhi khawpuia Talkatora Stadium-ah grand finale neih a ni. Hetah hian — TERAT — band hian band dangte tluk phak rual lohvin an thiamna pho langin, pakhatna lawmman an rawn hawn a ni. Band member zinga an guitarist Johan Malsawmkima chu best guitarist atan thlan a ni bawk.
‘’Ticket to Hornbill 2026’ band battle-ah hian ram chhung hmun hrang hrang atangin band 222 inlanin audition an nei a, heta tangin a thiam zual band 12 thlan chhuah niin, anni hian preliminary round inelna an hmachhawn leh a, a tawp ber finale-ah band panga ten pakhatna lawmman hawn ngei tumin intihsiakna hautak zet an hmachhawn leh a ni.
Daniel Lalawmpuia (vocals), Joshua Lalduhawma (drums), Malsawmtluanga (keys), Johan Malsawmkima (guitar), Benjamin Lallawmkima (bass) leh Denis Lalzamliana (guitar) te awmna — TERAT — band hnung zuiin Bengaluru band Steel Falcon chuan pahnihna dinhmun an luah a, Uttarakhand band Nchanter band chu pathumna an ni ve thung.
Pakhatna TERAT band hian lawmmanah Rs nuai 10 an dawng a, pahnihna Steel Falcon band-in Rs nuai 6 dawngin, pathumna Nchanter band-in Rs nuai 4 an dawng a. Mi mal anga lawmman hi Furtados leh Sennheiser chuan lawmman dawngtute hnenah Rs nuai 5 hu an hlan dawn bawk. Casio India pawhin kumin hian lawmman sem te hi an sponsor bawk.
Heng band pathumte hian kumin December 1 atanga ni 10 chhunga Kisama, Nagaland-a Hornbill Music Festival-ah hian hmun pawimawh (slot) an chang zui nghal a ni.
Intihsiaknaa lawmman pakhatna an dawn chungchangah Terat band guitarist Denis Lalzamliana chuan, “Tun tumah hian inbuatsaihna hun tha kan nei hleithei lo. Band member paruk zinga pathum hi Aizawl-a awm kan ni a, pathum hi Bangalore-ah contract musician an ni a. Chuvangin, zan hnih chiah inbuatsaihna neiin hla kan zir. Pakhatna lawmman kan dawng thei hi Pathian vang liau liau a ni,” tiin Thalai Times a hrilh.
‘Ticket to Hornbill’ inelna hi a tum thumna (third edition) a ni a, Nagaland pawnah hian neih a la ni ngai lo. Tun tum hi New Delhi-ah neih niin, Nagaland pawna an neih vawi khatna a ni.
Tun tum intihsiaknaah hian endiktu pathum — India band hmingthang Parikrama dintu Subir Malik; Nagaland Task Force Music and Arts (TaFMA) Chief Consultant Arpito Gope, leh India rama comic rock band hmasa ber KAPOW! khaipa leh vocalist Mayank Mittal te an ni.