Krismas leh kumthar kan hnaih zel a, mitin rilruah hunpui atana inbuatsaihna a awm chho tan. Hlim leh lawm tak, midangte harsatna siamtu ni lo zawnga hmang turin kan ngaihtuahna pawh a inbuatsaih chho zel niin a hriat.
Hetih lai hian engtik lai atanga kan chin tan nge tih pawh hriat lohin heng hunpui kan neihah te hian halpuah leh halmawi lam chi hman kan ching ta viau mai a, kan ringtu hmasate hman thin dan nen chuan a inang chiah tawh lovin a hriat a ni.
Tin, heng halpuah leh halmawi lam chite hi khap rem a har a ni ang, vawiin thlengin khapna thupek chhuah a la ngai a, man tam tak awm tawh mahse, a hremna lam a nep deuh vangte pawh a nimahna zawm a la hlawh tawk lo hle bawk.
Damlo leh kum lama upa zawkte tana hrisel lo tak, naupangte tana tha lo tak ni bawk, hriselna lama harsatna neite tana tha lo em em bawk si hi khapna thupek chhuah a la ngai reng a, hei hi kan la sim loh vang tih a chiang hle bawk a ni.
Sorkar chuan thupekte chu a han chhuah leh tawh ngei mai a, a kenkawh kawngah hian engtin zel nge hma a lak ang tih chu ngaihtuah zui ngai ve tak chu a ni. Kum kalta hrang hrangte anga khapna thupek chhuaha kan duh tawk a nih chuan kuminah pawh thupek awmze nei lo ber a ni leh ngeiin a rinawm.