Gaza-a indona avanga tlanchhiate awmna puan in sang tam tak chu ruah sur nasa tak avanga tui lianin a chim a, UN thuneitu chuan mi tin deuhthawin puih an ngai tih a sawi.
Mi chengte hian bel leh belthleng hmangin an puan ina tui lutte theh chhuah tumin an bei a, tam tak awmna tur nei rih lovin an awm phah bawk.
Unicef-a Palestine-te aiawh, Jonathan Veitch-a chuan Israeli-ten hmanraw lian leh tul dang, engine oil ang chite pawh lak luh a khuahkhirh avangin an dinhmun chu ‘a khirh tak zet’ tih a sawi.
Israeli-ten Gaza-a Hamas-te an beih avangin mi cheng 90% velin an chenna an tlanchhiatsan a, tam tak phei chu vawi tam tak tlanchhiat ngaiin an awm a. Tui leh inthiarna tha pawh an nei lo.
Tanpuitu pawlte chuan fur a intan mekah khawsak a harsa zual niin an sawi.
Gaza lailia Deir Al Balah atangin Veitch-a chuan BVC hnenah, “Kan theih ang angin puihna kan pe a, chutihrual chuan kawtthlerah min lo tiding a, puihna min lo dil hlawm thin,” a ti.
Gaza-a Hamas kaihhruai sorkar chuan tui lianin puan in 70,000 chuang a chim tih an sawi a. Thupuangtu chuan ‘in tam tak bang leh chung a khi’ tia sawiin thenkhat phei chu a derthawng hle tih a sawi.
Veitch-a chuan UN-in sum a ruahman a tlem avangin tarpaulin, plastic sheet leh puan in an dawng tlem tih a sawi bawk.
Gaza-a Israel leh Hamas indonaah hian nikum October thla khan inkahhai puan a ni a; mahse, Israeli-ten van sang atangin ni tin deuhthaw an la kap reng.
Inkahhai atang hian mi 1,580 thah an ni tawh niin Gaza-a Hamas enkawl health ministry chuan a sawi a, an chhiarna hi UN pawhin a pawmpui a ni a. Israel chuan civil mite an bitum ngai lo va, Hamas chauh an bei thin niin an sawi.
Hetih lai hian Gaza-a muanna a awm theih nana ruahmanna, US President Donald Trump-a sorkarin a duan chu kalpui chhunzawm a ni rih loh.
Inkahhai inremna hmang hian Israel-in Palestinian an man sang tel an chhuah a, Hamas-in Gaza-a Israeli an hren mi 48 an chhuah ve thung.
Indona hi Hamas-ten October 7, 2023-a Israel beia mi 1,200 chuang an thah leh hren tura Gaza-a mi 251 an hruai atanga intan a ni.
Israeli-ten phuba laa Gaza-a Hamas an beih atangin mi 74,594 vel thi an awm tawh niin health ministry chuan a sawi.