Cockroach Janta Party (CJP) dintu, Abhijeet Dipke-a chuan Narendra Modi-a sorkar chu kum 2029 Lok Sabha inthlanah paih thlak a ni dawn a, sorkar laipui inthlak tur atan mipuite inbuatsaih turin a chah.
Inrinnia CJP-in electoral roll ennaw, special intensive revision (SIR) leh Chief Election Commissioner (CEC) Gyanesh Kumar-a duh loh lantirna, ‘Jantar Mantar at Kochi’ tia hming vuaha Kerala-a an buatsaihah Dipke-a hian sorkar chu inthlan hmang chauhvin a inthlak thei a, tuma khawih danglam loh inthlan leh langtlang a duh thu a sawi.
BJP-in Modi-a’n thuneihna chang zui tura an sawina chhangin, “Kum 2029 atan lo inring rawh u, in kal tawh dawn,” a ti a. Kalkhawmten lawmin an au let nasa hle.
“Inthlan hmang chauhvin sorkar a inthlak thei,” a ti a, CEC Kumar-a bân chu inthlan dik a awm theihna atana tul a nih thu a sawi a. “Kumar-a a kal chuan Narendra Modi-a pawh a liam ve nghal ang,” a ti.
Dipke-a hian sorkar chu CEC a hum avangin thalaite nen an indo mek a, eng ang taka prime minister tana Kumar-a chu pawimawh nge tih a zawt.
Delhi-a CJP hruaitu dang, Saurav Das leh Ashutosh Ranka te nen Jantar Mantar-a kala hnam puanzar an vai tuma man an nih sawi chhuakin, a kalna apiangah a ken zel dawn thu a sawi.
“Hnam puanzar lek chhuah vanga lung ina khung kan ni a. Saurav-a leh Ashu-a pawh khung an ni a. Hetiang thil hi India-a a thlen hnuhnung ber chu British rorel hun lai daih tawhah khan a ni,” a ti.
Dipke-a hian India chu hruaitu pathumte ngaihdana din a ni tih a sawi a. Mahatma Gandhi-a chu India thinlung, BR Ambedkar-a chu a innghahna leh Jawaharlal Nehru-a chu a rilru a nih thu a sawi a. “Kum 120 pawh rorel la, anni aiin i lian ngai lo vang,” tiin Modi-a chu a sawi.
CJP chu ram dang atanga puihna dawnga India tihderthawn tuma puhna chhangin Dipke-a chuan Modi-a chu ram dang thiltihtheihna, a bik takin US President Donald Trump-a hnen atanga dawnga che zawk niin as awi.
CJP-in Inrinni tlaia Rajendra Maidan-a SIR leh CEC duh lohna lantirnaah hian pung khawm an tam hle a, thenkhat chu thalai tak an nih laiin upa deuhte pawh an tam hle a. Thalai pawl leh khawtlang huap pawl hrang hrangte pawh an tel a ni.
Mipuite hian Marine Drive atangin Rajendra Maidan thleng kawng an zawh hmasa a, hei hi lemchang thiam, Prakash Raj-a’n a kaihruai a ni.
India-ah hian October atang khan CJP bakah pawl leh eptu party hrang hrangte chuan SIR kalpui chu rorel lai, BJP hlawkpui theih tura dik lo taka kalpuia puhin kawtthlerah chhuakin duh lohna an lantir tan a. CEC chu he thil kalpuinaah hian a thawhpuite thu lo anga ama thua thil tiah an puh bawk.
BJP leh Election Commission of India (ECI) erawh chuan chutiang a awm lo tih an sawi a. CEC puhna pawh a thawhpuite nen ngaihdan hrang nei thin mah se thutlukna erawh lungruala an siam thin thu an sawi.