Seven Sisters’ Cultural Meet 2026 ni hnihna, Falkawn Zokhua-a neih Inrinni-a hawnna hunah thu sawiin Tourism Minister Lalnghinglova Hmar chuan India leh hmarchhak sawi hranna awm thin chu tha a tih loh thu sawiin, hmarchhak state zawng zawngte chu India khua leh tui dik tak vek an ni tih a sawi.
Minister chuan hmarchhak state-te chu an ram pianphung leh chanchin (history)-ah inhnaih zual bik hle mah se an danglamna hrang hrang kara an inpumkhatna chu India tiropuitu a nih thu a sawi bawk.
Tourism minister chuan hmarchhak state tinten anmahni pualin thil ropui tak tak an lo ti tawh thin tih sawiin, a mala an tih theih loh thil ropui tak takte chu inlungrual tak leh tum thuhmun neia an tanrual chuan an tipuitling thei dawn a ni, a ti.
He hun chhim tura state hrang hrang atanga kalte chu hnam ziarang hmuhnawm leh ropui tak tak an hmuhte chu an hawina lam theuh a mi dangte zinga hrilh darh zui turin a chah nghal bawk.
Ministry of Tribal Affairs bultuma buatsaih ‘Seven Sisters’ Cultural Meet’ hi ‘Unity in Diversity: The Northeast Symphony’ tih thupui hmanga neih niin Zirtawpni khan TRI, Kelsih-ah a ni khatna hi hman a ni a. He hmun pahnih a hmannaah hian hmarchhak state hrang hrang aiawhte chuan an hnam lam entirin hun hlimawm tak an hmang a ni.