Zanin atangin Youth Icon 2026 third round intihsiak leh dawn

Mipui ngaihhlut zaithiam thlanna EverHome Youth Icon 2026-a Third Round intihsiak hmachhawn turte hming puan chhuah leh tawh niin,mi 27 thlan chhuah zingah hian second round-a mipui ngaihven hlawh zual Lalrinawma, Mamit te, MC Laldingliani, Lallungmuana Venghnuai leh Vanrammawia, Lunglei Ramthar te an tel.

Second Round Intihsiakna chu November 10-12,2026 chhung khan LPS Studio, Zarkawtah neih a ni a, Second Round-a tling mi 55 ten intihsiak an hmachhawn thei vek a, chung zing atang chuan mi 27 te chu Third Round Intihsiak hmachhawn turin thlan chhuah an ni leh ta a ni.

Mi 27 in Third Round Intihsiakna an hmachhawn leh dawn lai hian Top 10-a hlan kai tawh mi pakhat a awm a. Icon Judge te hian top 10-a mi pakhat hlan kai theihna ticket pakhat ‘Ticket to Arena’ an nei a. He an ticket hi Second Round intihsiakna zan tawp berah hmangin, Andrew Lallawmzuala, Falkland – Aizawl chu top 10 ah an hlang kai a ni.

Youth Icon Organising Committee-in ruahmanna a siam dan chuan Third Round intihsiakna hi November 17-18,2026 chhungin neih a ni dawn a, November 19,2026-ah Result puan leh hman tum a ni. Mi 27 intihsiak hmachhawn tute atang hian Top 10-a tling turte chu thlan chhuah an ni ang.

Third Round intihsiak hmachhawn tur zingah hian Aizawl District chhunga mi tam berin, 8 an awm a. A bak chu Lunglei district atangin 6, Saitual district atangain 3, Kolasib District atangin 2 bakah Hnahthial, Serchhip, Siaha, Khawzawl leh Lawngtlai district atangin pakhat theuh an tling a, Mizoram pawn Manipur leh Assam atangin mi pakhat ve ve an tling bawk.

Third Round intihsiaknaah hian Mizo hla pakhat, a tluanin sak phal a ni a. Musical instruments: Acoustic guitar / Electric Bass/ Cajon / Keyboard chhawp chhuah a ni dawn a, a vaia hman theih a nih rualin Musical instrument hi mahni duh zat a hman theih bawk.

Round a san chhoh ang zelin Intihsiakna buatsaihtu lam pawhin inkaihhruaina an siam khauh zual a, Third Round atang hian hla sak that/sak nawn phal a ni tawh lo a, khawl lam chian lohna avanga loh theih loh thilah erawh inrawn tlang chungin a rem thei tura ngaih a ni.

Leave a Reply

error: Content is protected !!