Bruno Fernandes-a’n Manchester United-a a hun hnuhnung lam a hnaih mai thei a. Contract thar an zawrh chu a vawi hnihna atan a hnawl nia sawi a ni a, nakkum nipuiah chuan hmun dang panin a chhuak thei mai dawn niin a lang.
United captain hian Old Trafford-a a contract neih saah thla ruk chuang hret chauh hun a nei tawh a, kum khat dang pawh sei theihna erawh an la nei a. Amaherawhchu, club leh player hian inremna thar an siam thei lo a nih chuan a thlawna a chhuah hmaa hralh chu club tan a fuh zawk mai thei.
Hetiang hi thil awm dan a nih mek avangin Bruno hian United a chhuahsan chuan a zawm theih tur club langsar zual nia ngaihte han thlir kual ila.
- Sporting
A langsar ber pakhat a ni a, kum tam tak liam taa hming a lo chher tawhna a ni a, a thinlungah hmun pawimawh tak a la chang reng a. Kum 32 a ni tawh a, inkhelhna sang ber huangah hun tam a nei tawh bik lo tih a hriat a; chuvangin, a chawr chhuahna lama kir leh chu a tan pawh a chakawm viau mai thei.
- Saudi Arabia
Saudi Arabia-ah hian Fernandes-a hming sign hlan nghakhlel em em club hausa an tam a. Hei hian European football-a a hmuh phak loh tur sum tam tak a pe dawn a, a hun tawp lamah phei chuan hei hi thutlukna siamtirtu pawimawh tak a ni thei ang.
Galatasaray
Premier League player tha tak takten an hun tawp lama Turkey an pan hi thil thar a ni lo va. Galatasaray-in Fernandes hi an lo ngaihven daih tawh a, nipui lai pawh khan sum tam tham tak theh chhuah an lo inhuam tawh a. Champions League khelhna kawng a inhawn bakah hlawh tha tak an pek theih dawn avangin a tan pawh ngaihtuah tham a tling.
- Barca/Real Madrid
La Liga hi khelh a hautak lo deuh va, kum 30 pelh hnuah pawh a thiamna a la lantir theihna hun a siamsak ang. A contract tawp lam a hnaih tawh avangin manah buaina a awm lutuk dawn lo a, hei hian Spanish football club lian pahnihte mit a la viau thei a ni.