A thawktute nawrh avangin thawmhnaw siamna tam tak khar

Bangladesh-a thawmhnaw siam chhuahna hmuna an factory tam tak chu thawktuten hlawh sang zawk an phut avangin khar a ni.

Kartawp chhung khan an thawmhnaw siam chhuahna awm khawmna hmun – Savar, Ashulia leh Gazipur-a hmun 150 dawn chu khar a ni.

Bangladesh-ah hian thawmhnaw siam hi sumdawnna lian tak niin kum tin $ tluklehdingawn 40 chuang man thawn chhuak ziahin an ram sum thawh chhuah 10% a tum phak.

Thawktute hian a chhe berah thla khatah taka 30,000 (£182) tal hlawh an phut a. Tuna Bangladesh-a hlawh hniam ber hi taka 12,500 a ni a, thawktute hian hetiang lek hi chu khawsak man sang zelah tih ngaihna a awm tawh lo niin an sawi.

Pathianni tuk khan thawktute hian Gazipur-ah Dhaka-Tangail kawngpui an dang a, police-in an hnawh kian hma darkar khat chuang lirthei kal an dang hman.

Labour law an hmanah an thawhna neitute hian ‘thawh loh chuan hlawh pek loh’ an kalpui thei a, hei vang hian an thawh loh chuan hlawh pe lovin an khar thei.

Police Supt Mohammad Amjad Hossain-a chuan thawktute an kal loh avangin officer-ten factory-te an khar tih a sawi a. Inrinni zan khan 13 an khar a, ‘a tuk zinga nawrh huaihawt leh hnuah 16 khar leh a ni’ tih a sawi bawk.

Bangladesh-a thawmhnaw siamna hmunah hian mi maktaduai li chuang thawkin khawvela thawmhnaw siamtu lian ber ber – H&M, Primark, Zara leh a dang tam takin an dawr a ni.

China dawta hak nghal theih thawmhnaw thawn chhuak tam ber an ni a, tuna thawktute nawrh hian ram dang atanga dawrtute tan khaihlakna nasa tak a siam tura ngaih a ni.

Bangladesh Garment Manufacturers & Exporters Association (BGMEA) leh Bangladesh Knitwear Manufacturers & Exporters Association (BKMEA) chuan factory-te himna atana hma lak an phu mek bawk.

“BGMEA leh BKMEA hian wage baord (hlawh ennawntu tur) nen indawrna a awm mek chunga factory-te him lo taka nawrh chhunzawm a nih zel tho chungchangah hian kan ngaih a tha lo,” tiin BGMEA President Mahmud Hasan Khan-a chuan a sawi.

“Thawmhnaw siamna hmunte hi naktuk atangin hetiang renga nawrh huaihawt a niha engmah siam chhuah a awm loh chuan khar a ngai dawn a ni,” a ti.

Hetih lai hian thawktute hi inelna sang tak karah factory tan an theihna an hlan a, hlawh sang lo takin mi dang elin an bei niin an sawi ve bawk.

Garment Workers Trade Union Centre Vice President Joly Talukder-i chuan BBC hnenah ‘thawktute hian kum tam tak rit tak an phur’ niin a sawi a, hetih lai hian a factory neitu leh a dawrtuten an tawrhna atangin hlep tha tak an nei si niin a sawi.

“An dam khaw chhuah theihna tura an mamawh hlawh an phut a. Engtin nge mihringin an mamawhte hi ngaihsak lova a awm theih zawk?” tiin a sawi bawk.

November 1 khan sorkar chuan minimum wage board dinin thawktute hlawh ennawn turin a ti a. Board hi senior district judge-in kaihruaiin November thla tawpa rawtna thlen tura tih a ni.

Rawtna chu pawm a nih chuan December 1 atanga hman tan tura tih a ni bawk.

Leave a Reply

error: Content is protected !!