Hmeichhiate tana seat hauhsakna tur pharh tum

Parliament thlasik thutkhawm chu December chawlhkar hmasa berah koh a nih hmel a, tun tumah hian Lok Sabha ramri then kaihhnawih thei, hmeichhiate tana rorel khawla thutna tur hauhna dan siamna tur chu sorkarin a chhawp chhuak dawn nia rin a ni a. Hetih lai hian eptuite chuan electoral roll Special Intensive Revision (SIR) duh lohna an au chhuahpui ngei rin a ni ve thung.

Sorkar hian Lok Sabha bial ramri thena rorelna ina member 543 awm mek atanga 850 thlenga tihpuina tur constitution amendment bill hi tihtlang ngei a tum a. Hemi kaihhnawihah hian kum 2029 inthlanpui hmaa parliament leh state assembly-a hmeichhiate tana seat awm zat 33% hauhsakna tur pawh a tel dawn.

Parliament thutkhawm hun atan hian December chawlhkar khatna tinzawn a ni tih PTI chuan a tar lang a, a ni tak erawh sorkar hotu lianten an la tifel lo niin a tar lang.

Sorkar hian bill a pharh tur hi a kaltlangpui zo dawn em tih a chiang lo va, thil harsa tak a ni thei dawn a. Bill tlang tur hian Lok Sabha-ah thlawptu hmun thuma thena hmun hnih, vote 361 neih/hmuh tlin a ngai a. Tunah hian bial ruak pathum a awm a, member hi 540 an awm mek.

BJP kaihhruai NDA tangrualin member 320 an nei mek a, hmun thuma thena hmun hnih tling turin eptu party-te thlawpna an mamawh dawn.

Eptute zing atangin bill thlawp thei an awm dawn em a la hriat loh va. Tun hnaiah eptu party-te hian SIR duh lohna leh Chief Election Commissioner Gyanesh Kumar-a a bânna turin an nawr nasa hle a, parliament chhungah pawh an ken luh ngei rin a ni zawk.

Rorel lai tangruala MP pakhat chuan constitution amendment bill sawiho leh vote thlak tur hian rorelna inah dan pangngaia thil a kal loh chuan tih theih a ni lo tih a sawi.

Sorkar chuan vote an mamawh zat hi hmuh theih an inring niin a lang a. Sorkar lama hotu lian tak pakhat chuan Ningani khan an vote mamawh zat hi 15 atanga 18 velin an khum dawn niin a lo sawi tawh.

Hetih lai hian sorkar hi fur thutkhawm tawp atanga thlasik thutkhawm a koh har chungchangah sawisep a kai mek bawk a. Fur thutkhawm kha August 13-ah tihtawp niin ni 94 chhung thutkhawm a awm tawh lo va, kum 2008-a awl rei ber tum, ni 87 chu a khum tawh a ni.

Sorkar hian Lok Sabha bial chu state tinah 50%-a tihpun a ruahman a, a bikin chhim lam state-te chu bial tihzima member tam zawk an awm theihna turin a ruahman nia hriat a ni.

Bial thenkhat phei chu kum 1971 chhiarpui behchhana ramri kâna siam pawh sawi rik nia sawi a ni a, thutlukna tak erawh siam a la ni lo.

Hmeichhiate tana seat hauhsak leh bial ramri siam thar hi April 17-a parliament special sitting-ah khan pharh tawh niin a lo tlang zo lo tawh a ni.

Leave a Reply

error: Content is protected !!