Aizawl: Mizoram Pollution Control Board (MPCB) chuan Nilaini khan Member Secretary V. Lalengmawia hovin Aizawl khawpui chhung leh a chhehvela hotel leh stone crusher-te sawi lawk lovin (surprise checking) an enfiah a, phalna nei lova din leh dan bawhchhia eng emaw zat an hmu chhuak.
He enfiahnaah hian hotel leh stone crusher-ten dan an zawm tha em tih te, phalna nei thlapa din an ni em tih te, khawtlang leh mipuite tan an him tawk em tih bakah an bawlhhlawh leh thli nawite dan ang thlapin an sawngbawl em tihte uluk takin endik a ni.
Endikna atanga a lan danin, phalna nei lova din hotel leh stone crusher eng emaw zat an awm bakah vantlang tana hnawksak, dan zawm tha lo leh hriselna atana pawi thei turte hmuh chhuah a ni a; hei vang hian MPCB chuan khauh zawka hma lain surprise checking hi neih chhunzawm zel an tum a ni.
MPCB chuan hotel leh stone crusher bakah industry lam thil din tur reng reng chuan phalna lak hmasak ngei tur a nih thu sawiin, phalna nei lova lo din tawhte pawhin phalna an lak thuai a ngai a, phalna thi tawhte pawhin tihnun vat a tul thu leh danin a phut angin environment tichhe lo zawnga hma an lak ngei a tul thu a hriattir bawk.