Eng hunah emaw ber chuan tute pawh hi khawharnain min tlak buak vek a, a chawk dan leh tihziaawm dan tur phei chu hre lo tak kan ni hlawm. Zing chhun, zan, englai pawha thleng thei a ni a, khawharna tihah hian tute emawin an hnar vang leh kalsan vangte anih phei chuan a na ngawih ngawih a, beisei a bo ngawih ngawih thin.
Khawharna hi uluk taka enkawl emaw chinfel anih thuai loh chuan, depression ah te hial a inhlangkai thei a, mahn inthiamlohna te bakah pawimawh tawh lo nia inhriatna thengin a neih tir thei a, chu chuan hringnun hi a tibuai khaw lo zo ta thin a ni.
Ni e, khawharna hi tihziaawm theih a ni a, lak bo nghal duak theih pawh a ni. A pawi-mawh bera chu, kha harsatna leh, nangmah tibuai thintu kalsan hmiah a, inngaihtuah ut utna tur awm hman lo tura thil danga buai char char te hi thil tha tak a ni theihna chen a awm.
Buai chat rawh: I khua a har anih chuan kha thilah khan inchiahpil suh la, tho la, che chhuak rawh le. Mipui zi mur murna leh mipui tamna hmunah kal ve tawp mai rawh. I hmelhriat an awm leh awm loh kha a pawimawh ber lova, bul hnaia mi an lo zi nuai nuai tawh chuan boruak a dang thei khawp mai. I tuizawng leh nuam tihzawng tih nghal te hi a tha hle a, vengchhung leh kohhrana inhman te, pawl hrang hranga inhmante pawh a sual lo.
Inhmang rawh: Inthenawmah i \an thei a, kohhran-ah pawh bul i tan thei. No. 1 nen hian inzawmna an nei deuh nia lan theihna lai pawh a awm. Chutih laiin, inhman na ang chi erawh, hun a mamawh tam a, mamawh pawh a sâng daih zawk bawk. Pawl engemaw takah inhmang la, i inhman tam poh leh mihring pawh i hmu tam zel anga, khawharna hi buaipui chiam chi a ni tawh lovang. Khawhar hman ngai meuh lo te an awm phei chuan chung ho chu thlir thin la, a tlangpuiin heng mite hi buai ve tak tak, mi tam takte nena inzawmna nei an nih fo thin vang a ni.
Khawhar dangte hnem rawh: Nangmah ang bawk khan tanpui ngai an awm a, khawhar tak tak, an khawharna chingfel thei si lo te an ni. Heng mite hi tanpui a, theih tawp i chhuah pui hian, rei vak lovah i khawharna pawh chinfel deuh duak a ni tih i hmu chhuak nghal mai ang.
Ngaihdan thlak danglam rawh: Engngatinge mi thenkhatte hian an khawharna leh rilru hrehawmna tihbelh chhah thei tur ang chi an en a, an ngaihthlak fo le tih hi zawhna lian tak a tling. Rilru nâ leh keh sawm te hla sak i ngai thla thin em? Rawmawl leh tissue tam tak hman ngai film te i en thin em? Khai le, i ngaihdan kha thlak danglam a hun tawh e. I taksa leh rilru tiphur leh chawk phur thei tur ang chi music kha ngaithla zawk la, thuziak tha tak chhiar bawk ang che. Nangmaha awm ngaihdan fuh lo te kha paih chhuah vat vat hi a chinfelnan kawng tha tak a ni.
A chunga tarlan te hi khawharna tihziaawm dan leh enkawl dan thenkhat te an ni a, thil dang pawh a la tam ang. I tih tur pawimawh bera chu – i ngaihtuahna leh suangtuahna tih-zauh kha a pawimawh hle.
Hei hi hre bawk ang che
Zu leh ruihtheih thil te hian khawharna hi an enkawl dam thei lova, damdmawi thami an ni hek lo. Hengte hian an tizual kai zawk a, hriselna in a tawrh phah nasa hle bawk.
I khawharna tihziaawm leh tihdam i tumnaah khan eng hmanrua pawh hmang mahla, thian thar siam belh te, mi chi hrang hrang hmuh a, inlaichinna tha tak neih tuma hmalakna hi a lo tlo ber tho thova, chu chu i tan malsawmna pawh a ni.