Mihring beng pariat, thluak, mit leh hmai peng hrang hrang eng emaw zat chu Maharashtra khawpui, Mumbai-a Nashik-ah, Mumbai Naka veng an tiha dawr hnuaiah hmuh a ni tih Thawhtanni khan police-in an sawi.
Hetiang thil hmuh a nih hma hian a bulhnaia chengte chuan mihring taksa tawih rimchhe tak an hre thin a, an ringhlel chuan police hriattirin an dap ta a ni.
Heng mihring taksa an hmuhna dawr hi kum 15 kal ta chhung luah tawh loh a ni.
“Dawr chhung hian bungraw hluihlawn tawh chi hrang hrang chhehkhawmna a ni a. Plastic bawm pahnih kan han hawn chuan a chhungah mihring beng, thluak, mit leh hmai vel them eng emaw zat a lo awm a. Forensic team koh luh nghal niin heng mihring taksa pengte hi an la a, an chhui zui dawn a ni,” tiin Mumbai Naka police station thuneitu pakhat chuan a sawi tih news agency PTI chuan a tar lang.
Chhui hna thawh a nih zawh hma hi chuan police hian tualthah thubuai ziah luh an la tum rih lo.
Police-in an sawi dan chuan dawr neitute fapate pahnih chu damdawi lam thiamna zirlai an ni a, heng mihring taksate hi an zirna atana an dah that pawh a lo ni thei tih an sawi a. Chutianga hman tur ni awm tak chuan taksa pengte hi damdawi (chemical) hmanga sawngbawl/phul vek an ni bawk.
“Dawr neitu fapate pahnih hi doctor an ni a, an zirna atana hetianga an dah that hi a lo ni reng thei a. Hetih rual hian kil hrang hrang atangin chhui hna thawh mek a ni a, tun dinhmunah chuan thubuai pawh kan la ziak lut rih lo,” a ti.
ABP Majha chanchinbu hnenah pawh Police Commissioner Pournima Chowgule chuan an thil hmuhte chu ruang a nih chuan tualthattu an man ngei tur thu a sawi a. “Hetih rual hian beng pariatte hi uluk taka zai thlak a ni a, hetiang ti tur chuan a thiam bik (specialist) emaw, ni tina ti thin emaw nih a ngai,” a ti.
Dawr neitu erawh chuan hetiang thil an lo kawl hi a hriat loh thu a sawi thung.