Aizawl: India ram pumah Covid-19 hri a tlak hniam zel avangin Ministry of Home Affairs chuan ralpui phiarin a phiar tawh dawn lo. Disaster Management Act hmanga kaihhruaina leh inkhuahkhirhna a lo siam thinte pawh ti tawh loin hemi chungchanga hmalakna chu Ministry of Health & Family Welfare kutah a dah tawh dawn.
Ministry of Home Affairs Secretary Ajay Bhalla chuan India ram state leh UT chief secretary-te hnenah lehkha thawnin, Disaster Management Act hmanga khuahkhirhna chi hrang hrang a lo tihchhuah tawhte hman chhunzawm leh chhunzawm loh chu state leh UT te thua dah a nih thu a sawi a. Covid-19 do chungchangah hian Ministry of Home Affairs chuan thuchhuah thar a nei dawn lo tih a sawi.
Ministry of Home Affairs atangin kaihhruaina leh khuahkhirhna thar awm tawh dawn lo mah se Ministry of Health & Family Welfare-in kaihhruaina a siam, heng hmui tuam, kut vawn thianghlim leh a dangte erawh chu a la awm reng tho dawn tih lehkha tar lan a ni a, hri leng chungchangah hian state leh UT-te chu inthlahdah chuang lo turin a ti.
Hri hi a hluar leh a nih pawhin Ministry of Health & Family-in kaihhruaina tihchhuah hrang hrangte hmanga a tul anga hma lo la ve mai turin a ti bawk.