Mizoram IOCL Transporters’ Forum (MITF) leh IOCL te inkara tuialhthei phurh man chungchangah inrem theih lohna a awm avanga hun eng emaw chen tuialhtheiah harsatna a thlen hnuah MITF-in tuialhthei phurh an chawlhsan chu nimin khan an titawp lailawk.
MITF leh IOCL te tuialhthei phurh man chungchanga an inrem theih loh avanga Mizorama tuialhtheia harsatna thleng mek chungchangah nimin khan supply department hotute, IOCL leh MITF hotute chu Supply Secretary Zothanmawia pisaah an thukhawm a, sorkar aiawhte hian MITF-te chu tuialhthei phur leh turin an ngen.
He an inbiaknaah hian Supply Secretary Zothanmawia chuan tuialthei phurtu leh a zuartute chu essential services-in a huam tel thu leh an hlawkna ngawr ngawr piah lama mipui rawngbawlna a tel tlat thu a sawi a, MITF-te chu IOCL rate thar chu eng emaw chen hmang phawt turin a ngen a, chu rate chu transporter-te tan awmzia a awm ngang lo a nih chuan IOCL hnenah ennawn tura thlen an tum thu a sawi.
MITF hruaitute pawhin harsatna an tawh dan sawiin, Vairengte-a paper depot-a stock transfer ti kher lova source depot atanga direct-a POL an lak ve theih nana hma laksak turin sorkar an ngen a, sorkar aiawhte chuan MITF thu thlen chu enzuisak an rem ti a ni.
Sorkar aiawhte nen an biak hnuah hian MITF hruaitute chu thukhawm ve nghalin, sorkarin an ngenna chu pawmin lungawi lohna an lantir chu tihtawp an rel ta a ni.
Hemi chungchanga thuchhuah an siamah, IOCL-in 2016 rate aia hniama tlan tura a tih an dodal avanga Mizorama tuialhthei lut lo pawi an tih thu sawiin, rate hniama tlan la pawm lo mahs e, an dodalna lantir titawpa mipui harsatna sukiang tura tuialhthei lak luh dan kawng zawn an remti tih an tar lang.
Tar lan tawh thin angin, MITF leh IOCL te tuialhthei phurh man chungchangah an in rem theih loh avangin Mizoramah tuialhthei phurh luh a khailak nasa a, filling station tam zawkah coupon leh permit nei lo tan tuialhthei lak theih a ni lo a ni.