Jose Mourinho-a pawlten an ngam loh tawh Norwegian club bawk an ngam lo nawn a. Europa Conference League quarter-final first leg-ah Bodo/Glimt lakah 2-1 in an tlawm.
Bodo/Glimt hian group stage-ah khan Roma hi mualpho takin 6-1 in an sawp tawh a. Ningani zana Aspmyra Stadion a inkhelah erawh goal chhuah hmasa zawkah an \ang.
Roma tan Lorenzo Pellegrini chuan halftime dawnah goal a khung a. Mikhual team hi inelna hrang hrangah match 9 tlawm tawh lo an ni a, hnehna chan tumin dinhmun \ha zawkah an ding hmasa.
Mahse second half-ah an hmahruaina an hum thei lo. Ulrik Saltnes chuan minute 56-naah an si phurh sutna a ti lut a. Minute 89-naah Amahl Pellegrino freekick pet a\angin Hugo Vetlesen chuan an chakna goal a khung.
Roma substitute Eldor Shomurodov chuan huntawp hma in an si phurh a sut teuh a, crossbar chung chiah a ball tauh a kal.
Inkhel zawhah Jose Mourinho chuan referee a sawisel a. “Rome a kan inkhelh pawhin penalty vawi hnih kan hmuh ngei tur pek kan ni lo tawh a, zaninah pawh offside miah lo offside tia phar a ni a. Inkhel enkawl dan a hniam hle tih a lang.” a ti a. An inkhelhna mual sawisel bawkin Gianluca Mancini inhliam chhanah a puh.
“Mancini inhliam kha ka ngaihmawh tak a ni, a chhan chu plastic phullem a khelh chuan khatiang kha a thleng \hin.” a ti bawk.
Foxes an chak zo lo
Leicester City chuan PSV Eindhoven an mikhual a, goal inpe lovin an inhnehtawk.
King Power Stadium a Europa Conference League quarter-final first leg inkhelah Foxes in ball chang tam mahse goal hlauhawmah an chhuah tam lo. Harvey Barnes chuan halftime dawnah crossbar a tihper a, a bak erawh hlauhawm mumal tak an nei lem lo.
PSV zawkin second half-ah penalty beiseina an nei a, Ricardo Pereira chuan Cody Gakpo a ti tlu a, VAR hmanga endik ni lovin referee in penalty a pe lova. Hei hi inkhel zawhah PSV head coach Roger Schmidt chuan, “Ka ennawn leh a, penalty chiang tak a ni. VAR \ha ti tak ka nih lem loh avangin engmah erawh ka sawisel lovang. Penalty a ni a, mahse referee ten tihsual hi an nei ve thei.” a ti.