Rukruk a hluar, mitin fimkhur thar a ngai
Mizoram police hotute sawi danin kan ramah rukruk a hluar hle mai a, mitin fimkhur kan ngai hle. Aizawlah ngat phei chuan chhungkaw tin hnathawh tul tak tak nei kan ni hlawm a, in nghak awm mumal loh chang nei kan tam hle. Hetiang hun hi rukruk hratte chetchhuah hun a nih avangin kan in leh a vel venhim dan kawng hrang hrang kan ngaihtuah a ngai hle a ni.
Thuthar thehdarhtute a kawmnaah Aizawl SP C. Lalruaia chuan kumin January leh March thla chhung khan Aizawl khawpui chhunga police station pali-ah thubuai 572 ziahluh tawh niin, heng zinga thubuai 397 (69.64%) hi rukruk thubuai a nih thu a sawi a, thla rei lote chhunga rukruk case tamzia hi mak tak a ni.
Hri leng vangin hnathawk thei lovin rei fe kan awm a, kan inkharkhip a, mahse kan eitur leh mamawh a kiam chuang si lo. Hnathawk peih lo leh ruihhlo ti thin zingah mahni ruihhlo tihna tur ngaihtuaha rukruk mai hreh lo an tam phah hle tih a chiang a, mitin/chhungkaw tin fimkhur kan ngai hle. Kan in leh a vel a him theihna kan ngaihtuah thar pawh a tul hle.
Tin, police hotute sawi danin, mi thilrutu leh thil ruk leisaktute chu angkhat, hremna pek ve ve theih an ni bawk a, hriat chian loh hnen atanga thil man tlawm fal lei loh a him reng bawk tih kan hriat thar a ngai. Fimkhurah fimkhur luat a awm thei lo tih hrereng chungin, rukru lakah leh thilruk hralhtute lakah mitin i fimkhur zual sauh sauh ang u.